Jelide beıtanys jandardyń toıyna kirip meıman bolý trendi tarady. Blogerler nemese qarapaıym jeli qoldanýshylary da bul dástúrden qapy qalyp jatqan joq. Mundaı jaǵdaıda zań boıynsha shaǵym túsirýge bola ma? Bul qaıdan shyqqan "batpan quıryq"? Aqshamnews.kz tilshisi zerttep kórdi.
"Qudaıy qonaqtar" qaıdan qaptady?
Mundaı úrdis TikTok jelisinde trendke aınaldy. Blogerler bastaǵan "kezdeısoq toıǵa kirý" ıdeıasyn jeli qoldanýshylary da qaıtalap júr. Trend júıesi boıynsha adamdar sándenip kıinip, kez kelgen toıhanaǵa kirip, tanymaıtyn kisilerdiń qonaǵy bolady. Jaı ǵana kirip shyǵa salmaı, dastarhannan dám tatyp, bı de bılep, asabanyń oıyndaryna da qatysatyndary da taǵy bar. Ásirese jazda toı maýsymy qyzǵan shaqta bóten toıǵa kiretin "qudaıy qonaqtar" qatary kóbeıdi. Olardyń bul áreketterin TikTok-tan izdeseńiz, qaptap shyǵa keledi.
Tanymal tilshiniń toıyndaǵy "tanymaıtyn qonaqtar"
Trendtiń tusaýyna jýrnalıs Aqbópe Táńirbergen de tústi. Jaqynda shańyraq kótergen "Eýrazıa" birinshi arnasynyń tilshisi áleýmettik jelide toıyna tanymaıtyn qyzdar kelip, qonaq bolyp ketkenin bólisken edi. Biz bul týraly tolyǵyraq surap bildik.
Tilshiniń toıyna barǵan kezdeısoq qonaqtar júzderi jelide "jylt" etken soń, Aqbópeden vıdeony óshirýin surap, jaǵdaıdy túsindirgen. Olar keshirim surap, toıǵa trendtiń sońynan qýyp kelgenin aıtqan.
"Basynda jaı kirip shyǵamyz, kishken bılep, tamaq iship qaıtamyz dep oılaǵanbyz. Biraq, sizderdiń toılaryńyz óte qyzyq bolyp, sońyna deıin otyrdyq. Keshirim suraımyz! Aıybymyzdy qalaı jýyp shaıamyz?", - dep jazǵan eki qyz.
Al jýrnalıs olarǵa mundaı árekettiń durys emestigin eskertip, jaǵdaıdy jyly japqan. Jaǵdaıdy jelide bólisken soń, oǵan "bizdiń de toıda osyndaı jaǵdaı bolǵan", "as bergenimizde de beıtanys adamdar kelip, sarqyt ta salyp alyp ketken" degen hattar kelgen.
Shaqyrylmaǵan qonaqtar Dımash Qudaıbergenniń qaryndasynyń toıyna da barǵan
Tamyz aıynda Shymkentte Dımashtyń qaryndasy Raýshan Qudaıbergenniń uzatý toıy ótti. Bloger Araı Sultannyń jazýynsha, bul toıda da "qudaıy qonaqtar" qonaq bolǵan.
"Meni uıatqa qaldyrdy. Meıramhananyń mekenjaıyn belgilep edim, tosyn jaǵdaıǵa ulasyp ketti. Adamdar jabaıylyǵyn kórsetti. Jeti qyz qalyńdyqtyń qurbysy bolyp, toıǵa kelipti. Olar toı jasap jatqandardyń týysqany da, tanysy da emes. Baryn kıip, sándenip kelipti. Bul – óte uıat jaǵdaı. Shaqyrylmaǵan jerge kelý uıat emes pe?! Toı ıeleri adam basyna aqsha tóleıtinin eskerińizder”, – dep jazdy bloger.
Al Threads qoldanýshylary mekenjaıdy jarıalaǵan blogerdiń ózin kinálady.
“Araıdyń ózi de birden meıramhanany kórsetti”, “Ol qyzdar Dımashtyń kózine túsýge barǵan shyǵar”, “Bloger ǵana emes, toıǵa kelgenderdiń bári salyp otyrdy”, “Raýshannyń uzatý toıy kúshti ótti”, “Salma dep eskertip turǵanda, nege salady eken”, “Shaqyrylmaǵan qonaq, sypyrylmaǵan jerge otyrady” degen osy”, – dep jazdy kópshilik.
sýret: instagram.com/raushan_kudaibergen
Zań ne deıdi?
Zańger Arman Sháripov mundaı jaǵdaıda shyǵyn keltirgen adamdardyń jeke basyn anyqtap polısıa shaqyryp, shaǵym túsirýge bolatynyn aıtty:
"Bul jerde toı ıelerine shyǵyn keltirip otyr. Sebebi toı ıeleri óziniń ár qonaǵyna bron jasap, aqshasyn tólep qoıady. Bóten bireý kelip, sol brondalǵan orynnyń tamaǵyn jeıdi. Bul árıne quqyqbuzýshyqylyq. Máselen, bul kez kelgen tamaqtanatyn orynǵa baryp, aqshasyn tólemeı ketip qalý degenge uqsas jaǵdaı ǵoı. Meniń tájirıbemde mundaı jaǵdaı bolǵan. "Alaıaqtyq" bapy boıynsha is sotqa deıin jetip, biraq eki tarap mámilige kelip, tarqasqan bolatyn. Al toıǵa shaqyrylymaǵan qonaqtyń kelip otyrǵanyn kórgen toı ıeleri 102 shaqyryp, aryzdanyp, "alaıaqtyq" nemese "urlyq" baptary boıynsha is qozǵaýyn talap etýine bolady", - deıdi maman.