Kúndelikti kúızelis, mazasyz oılar men ishki qysymnan arylý úshin arnaıy mamanǵa júginý mindetti emes.
Psıhoterapevt Sallı Beıker bul jaǵdaımen óz betińizshe kúresýge kómektesetin úsh kezeńnen turatyn qarapaıym ádisti usynady. Nebári 15 mınýt ýaqytyńyzdy alatyn tásil jaıly Aqshamnews.kz tilshisi tolǵyraq jazady.
Beıkerdiń aıtýynsha, mazasyz oılar adamnyń basynan shyqpaı qoıady. Oǵan sebep - adam ózin mazalaǵan oıǵa únemi oralyp, sonyń shyrmaýynan shyǵa almaýynda. Al buǵan qarsy turý úshin oı men deneni basqarýdy úırený qajet.
1-qadam: Mazalaǵan oıdy anyqtaý
Eń aldymen, mazasyzdyqty týdyrǵan naqty oıdy anyqtap kórińiz. Sol kezde deneńizdiń qaı tusynda qandaı sezim bar ekenin baqylańyz.
«Ózińizden surańyz: bul mazasyzdyqty men qaı jerimnen sezip turmyn? Basym ba, júregim be, ishim be, ıyǵym ba, álde basqa bir bólik pe?» – deıdi Beıker.
Bul qadam oıyńyzdy syrtqa shyǵaryp, onyń naqty ne ekenin tanýǵa kómektesedi.
2-qadam: Nazardy basqa jaqqa aýdarý
Kelesi kezeńde mıǵa tynyǵýǵa múmkindik berý úshin nazardy jeńil, beıtarap nysanǵa burý kerek. Bul úshin myna ádisti oryndaý kerek:
- Kóz deńgeıinde ornalasqan eki núkte tańdańyz (mysaly, qabyrǵadaǵy eki burysh);
- Aldymen bireýine 1 mınýt qarańyz;
- Keıin ekinshisine qarańyz;
- Sońynda eki núkteniń arasyndaǵy bos keńistikke nazar aýdaryńyz.
«Bul jattyǵý mı jumysyn tynyshtandyrady. Aldymen siz mazasyz oıdy tolyq sezdińiz, endi fokýsty qarapaıym nársege aýystyra otyryp, deneńiz ben sanańyzdy qaıta baǵyttaısyz», - deıdi maman.
3-qadam: Sol oıǵa qaıta oralyńyz
Sońǵy qadamda bastapqyda mazalaǵan oıǵa qaıta oralyńyz. Biraq endi sizdiń oǵan degen reaksıańyz basqasha bolady - mı tynyshtalǵannan keıin, ol sizge basyndaǵydaı aýyr áser etpeıdi.
Bul ádis kimge kómektesedi?
Bul tehnıka ásirese mynadaı jaǵdaılarda paıdaly:
- Túnde mazasyz oılardan uıyqtaı almaı jatqanda;
- Kenetten ýaıym nemese qorqynysh bıleı bastaǵanda;
- Panıkalyq shabýyldyń aldy sezilgen kezde;
- Uıqysyzdyq, kúızelis, sharshaý jıi mazalasa.
Psıhologtar kúnine 10–15 mınýtty ózińizben nemese jaqyndaryńyzben shynaıy áńgime qurýdy usynady. Bul - ishki turaqtylyq pen senimdilikti qalyptastyrýdyń eń qarapaıym joly.
Qysqasha aıtqanda, bul jattyǵý - mı men deneni qatar tynyshtandyryp, mazasyz oıdan arylýǵa kómektesetin jeńil ári qoljetimdi tásil. Kún saıyn qaıtalap otyrsańyz, nátıjesi de aıqynyraq baıqalady.