Koleksıalyq monetalar Qazaqstan teńge saraıynda daıyndaldy.
2023 jylǵy 6 jeltoqsanda Qazaqstan Ulttyq banki "Banknotalardaǵy portretter" serıasynan Ál-Farabı, Qurmanǵazy jáne Súıinbaı koleksıalyq monetalaryn aınalymǵa shyǵarady, dep habarlaıdy Almaty-akshamy.kz
Ulttyq bank "Banknottardaǵy portretter" serıasyndaǵy koleksıalyq monetalar týraly málimet berdi:
"Jańa monetalar 1993 jylǵy úlgidegi Qazaqstan Respýblıkasynyń ulttyq valútasy banknotalarynyń birinshi serıasynyń portrettik beınelerine arnalǵan. Onda kórnekti tarıhı tulǵalar – ǵalym Ál-Farabı, aıtysker aqyn Súıinbaı Aronuly, kúıshi Qurmanǵazy, ǵalym ári etnograf Shoqan Ýálıhanov, aqyn ári fılosof Abaı, sondaı-aq qazaq handary Ábilqaıyr men Abylaı beınelengen".
2011-2013 jyldary Ál-Farabı, Qurmanǵazy jáne Súıinbaı koleksıalyq altyn monetalary aınalymǵa shyqty.
"Kolleksıonerler men halyq tarapynan bolǵan suranysty eskere otyryp, serıa kúmis jáne neızılber qospasynan jasalǵan monetalarmen tolyqtyrylyp otyr", dep málimdedi QR Ulttyq banki.
Monetalar:
árqaısysy 925/1000 synamdy kúmisten, salmaǵy 31,1 gram, dıametri 38,61 mm, proof daıyndaý sapasymen, nomınaly 500 teńgelik, taralymy 2 000 (eki myń) danada jasaldy;
árqaısysy MNS 15-20 neızılber qospasynan, massasy 11,17 gram, dıametri 31 mm, uncirculated daıyndaý sapasymen, nomınaly 200 teńgelik, taralymy 50 000 (elý myń) danada jasaldy.
"Koleksıalyq monetalar Qazaqstan Respýblıkasynyń búkil aýmaǵynda ózderiniń belgilengen qunymen tólemniń barlyq túrleri boıynsha qabyldanýǵa, sondaı-aq eldiń barlyq bankinde bank shottaryna esepke alynýǵa jáne aýdarýǵa, usaqtalýǵa jáne aıyrbastalýǵa mindetti", delingen QR Ulttyq bankiniń aqparatynda.