500-den astam adam jolaýshylar poıyzymen Taraz, Shymkent stansalaryna jetkizildi.
Búkil el aýmaǵynda qalyń qar jaýyp, boran soǵyp, kún raıynyń kúrt buzylýyna baılanysty birqatar joldar jabyldy. Osyndaı jaǵdaıda «Qazaqstan temir joly» qar basqan avtojoldardan evakýasıalanǵan adamdardy poıyzben áketip jatyr, dep habarlaıdy Almaty-akshamy.kz QazAqparatqa silteme jasap.
Ótken táýlikte júktemesi az Borandy, Shoqpaq, Qurkúreýsý, Túlkibas stansalarynan 500-den astam adam jolaýshylar poıyzymen Taraz, Shymkent stansalaryna jetkizildi.
Sondaı-aq keri baǵytta 270-ke jýyq adam tasymaldandy.
Qazirgi ýaqytta ulttyq tasymaldaýshy avtojoldardyń jabylýyna baılanysty jolaýshylardy temirjol kóligimen áketý jumysyn jalǵastyryp jatyr.
Sońǵy kúnderdiń kúrdeli meteorologıalyq jaǵdaılaryna qaramastan, «QTJ» UK» AQ barlyq qurylymdyq bólimsheleri júkter men jolaýshylardy úzdiksiz jáne qaýipsiz tasymaldaýdy qamtamasyz etý boıynsha sharalar qabyldaýda.
Temirjolshylardyń jumysyn Jambyl oblysyndaǵy elektr jelisiniń baǵanalaryn qulatqan qatty jel qıyndatyp otyr.
Elektr jelileriniń úzilýi saldarynan Qarataý – Jańatas ýchaskesinde poıyzdardyń qozǵalysy telefon baılanysy arqyly uıymdastyryldy.
Sondaı-aq, QTJ Almaty-2 stansasynan jaryq pen jylýsyz qalǵan Jańatas qalasyna dızel-generatorlyq qurylǵysy bar eki vagon jóneltti.