Astana qalasynyń EXPO kórme ortalyǵynda ótken Kazakhstan Security Systems-2025 halyqaralyq qaýipsizdik kórmesine Fransıa, Germanıa, Italıa, Reseı, Túrkıa, Ázerbaıjan jáne basqa da elderdiń kompanıalary qatysty, dep habarlaıdy aqshamnews.kz.
«Astana-Ekspo KS» kórme kompanıasynyń bıznesti damytý jónindegi dırektory Oljas Qanapıanov bul halyqaralyq kórme jyl saıyn álemniń túrli elderinen júzden astam eksponentterdi biriktiretinin atap ótti. Kórme alańynda kásipqoılar kıberqaýipsizdiktiń, qol jetkizýdi baqylaýdy qorǵaýdyń ózekti máselelerin, qorǵanys jáne quqyq qorǵaý salalarynda qoldanylatyn jańalyqtardy talqylaıdy.
Kórmede QR Ulttyq qorǵanys ýnıversıteti aqparattyń syrtqa shyǵyp ketýiniń tehnıkalyq arnalaryn anyqtaý jáne úı-jaılardyń qorǵalýyn baǵalaý boıynsha júrgizilgen arnaıy zertteýler zerthanasynyń qyzmetterin usyndy. Qaýipsizdik salasyndaǵy mamandardy VR/AR-tehnologıalardy paıdalana otyryp ǵylymı zertteýlerdi qoldaý boıynsha perspektıvaly geoaqparattyq tehnologıalar zerthanasynyń, robottandyrylǵan júıelerdi, UUA ázirleý jáne synaý jónindegi tehnoparktiń qyzmetteri de qyzyqtyrýy múmkin. Ázirleýshiler arsenalynda UQÝ-proeksıalyq jabdyq, lazerlik gravúra stanogy, aerofototúsirilim kesheni jáne mashınalyq kórý júıesi bar. Sondaı-aq, 3D modelderin qurý jáne qarý-jaraq pen áskerı tehnıkanyń úlgilerin matematıkalyq modeldeý boıynsha da usynystar engizilgen.
– Ulttyq qorǵanys ýnıversıteti mundaı aýqymdy forýmǵa alǵash ret qatysyp otyr. Bizdiń pavılon barlaýdyń tehnıkalyq quraldaryna qarsy is-qımyl, aqyly qyzmet kórsetý jáne ǵylymı-zertteý vzvodyna merzimdi áskerı qyzmetke kirý týraly usynys syndy birneshe baǵytqa bólingen. Bul bólimshege tehnıkalyq jáne IT-mamandyqtar boıynsha joǵary bilimi bar jastardy shaqyramyz, – dedi áskerı oqý ornynyń ókili aǵa ǵylymı qyzmetker kapıtan Ádilet Orazqanov.
Joǵary áskerı oqý ornynyń servıstik paketinde biliktilikti arttyrý, aǵylshyn tilin qarqyndy oqytý, ártúrli materıaldardan úlgilerdi ázirleý jáne daıyndaý jónindegi qyzmetter, áskerı kafedralardyń oqytýshylary men ákimderdiń kómekshilerine arnalǵan kýrstar jáne basqalar bar.