Almaty qalasynda el Táýelsizdiginiń 30 jyldyǵyna oraı «Qazaqstan Respýblıkasy Ulttyq ǵylym akademıasynyń jetistikteri: bilim men ǵylymnyń jańa strategıasy» atty dóńgelek ústel bolyp ótti. İs-sharany QR Ulttyq ǵylym akademıasy men Almaty aımaqtyq rektorlar keńesi birlesip uıymdastyrdy.
İs-sharaǵa QR Bilim jáne ǵylym mınıstri Asqat Aımaǵambetov, QR Parlamenti Májilisiniń depýtaty Ámirhan Rahymjanov, Almaty qalasy ákiminiń orynbasary Erjan Babaqumarov jáne QR Ulttyq ǵylym akademıasynyń Prezıdıým músheleri men akademıkteri, elimizdiń jetekshi JOO rektorlary men belgili ǵalymdar, zıaly qaýym men BAQ ókilderi qatysty.
Dóńgelek ústeldiń maqsaty – osynaý otyz jyldyń ishinde elimizdiń ǵylym men bilim salasyndaǵy atqarylǵan jetistikterimizge baǵa berý jáne aldaǵy mindetterdi aıqyndaý.
Otyrysty ashyp, júrgizgen moderator – Almaty aımaqtyq Rektorlar keńesiniń tóraǵasy, QazUAZÝ Basqarma tóraǵasy rektory Tilektes Espolov búgingi tańda bilim men ǵylym memlekettiń áleýmettik-ekonomıkalyq damýynyń, sondaı-aq ınovasıalyq júıe men adamı kapıtaldyń basty faktoryna aınalǵanyn atap ótti.
Bul baǵytta Ulttyq ǵylym ordasy otandyq bilimdi, ǵylymdy damytýda erekshe ról atqaryp keledi. Búginde ǵylym salasynda 23 myńdaı adam jumys jasaıdy. Ǵylymı-zertteý jáne tájirıbelik-konstrýktorlyq jumystarǵa jumsalatyn ishki shyǵyndardyń ósýi baıqalady. Ǵylym men bilim salasynda oń ózgerister júrip jatyr. Mysaly, «Pedagog mártebesi týraly» zań qabyldandy, Qazaqstan Respýblıkasynyń «Bilim týraly», «Ǵylym týraly» zańdaryna ózgerister men tolyqtyrýlar engizildi. «Qazaqstan Respýblıkasynyń bilim berýdi jáne ǵylymdy damytýdyń 2020-2025 jyldarǵa arnalǵan memlekettik baǵdarlamasy, Qazaqstan Respýblıkasynyń 2025 jylǵa deıingi joǵary bilimin ınternasıonaldandyrý strategıasy bekitildi. Biryńǵaı Ortalyq Azıalyq joǵary bilim keńistigin qurý týraly Deklarasıa, Bolon úderisi hatshylyǵynyń Qazaqstan Respýblıkasynyń joǵary bilim berýdiń ulttyq biliktilik sheńberin ózin-ózi sertıfıkattaýy týraly esep qabyldandy, ıaǵnı qazaqstandyq joǵary oqý ornynyń dıplomdaryn barlyq Eýropa elderinde moıyndaıtyn bolady.
Sonymen qatar, dóńgelek ústel aıasynda 60 jylǵa jýyq elimizdiń ǵylymyna eńbek sińirip kele jatqan kórnekti qoǵam jáne memleket qaıratkeri, otandyq ǵylymdy alǵa damytýshy kóshbasshy, uıymdastyrýshylyq qabiletti joǵary, tektiden tamyr tartqan parasatty tulǵa – Ulttyq akademıany 18 jyl boıy basqaryp kele jatqan akademık Jurynov Murat Jurynulynyń 80 jyldyq mereıtoıy atap ótildi.
Murat Jurynov ǵylymnyń basty lokomotıvi – QR Ulttyq ǵylym akademıasynyń prezıdenti, QR Premer-mınıstriniń keńesshisi retinde elimizdiń ǵylym salasyn damytýǵa aıanbaı basshylyq jasap keledi. Sondaı-aq, hımıa ǵylymdarynyń doktory, profesor, Halyqaralyq ınjenerlik akademıasynyń, Halyqaralyq joǵary mektep ǵylym akademıasynyń, QR Jaratylystaný ǵylymdary akademıasynyń akademıgi, Djordjtaýn ýnıversıtetiniń (Vashıngton) qurmetti profesory retinde hımıa salasynda 20 monografıanyń, 500-den asa ǵylymı maqalanyń, 108 patenttiń avtory atandy. Bul týraly belgili ǵalym, QR UǴA akademıgi jáne Prezıdıým múshesi Dosym Súleev keńeıtilgen baıandamasynda tolyqtaı atap ótti.
QR Bilim jáne ǵylym mınıstri Asqat Aımaǵambetov Murat Jurynovqa Elbasy Nursultan Nazarbaev pen Memleket Basshysy Qasym-Jomart Toqaevtyń qazaqstandyq ǵylym men bilimniń damýyndaǵy qajyrly qyzmeti úshin alǵysy jazylǵan mereıtoımen quttyqtaý hattaryn tabys etti.
QR Parlamenti Májilisiniń depýtaty Ámirhan Rahymjanov akademıkke QR Parlamenti Májilisiniń tóraǵasy Nurlan Nyǵmatýlın jáne QR Parlamenti Senatynyń tóraǵasy Máýlen Áshimbaevtyń quttyqtaýlaryn jetkizdi.
Almaty qalasy ákiminiń atynan ákim orynbasary Erjan Babaqumarov Murat Jurynovqa "Eńbegi úshin" medalin, al QR UǴA vıse-prezıdenti Ǵalymqaıyr Mutanov "Qazaqstan Joǵary mektebiniń qurmetti qyzmetkeri" tósbelgisin, QR Joǵary oqý oryndary qaýymdastyǵynyń tóraǵasy, Rahman Alshanov Qaýymdastyqtyń ordenin tabys etti.
Sondaı-aq, Murat Jurynulyn jaqyn jáne alys shetelderdiń ǵylym akademıalarynyń basshylary, QR Ulttyq Ǵylym akademıasynyń tóralqa músheleri, korespondent-músheleri men akademıkter, elimizdiń jetekshi JOO rektorlary, zıaly qaýym men qoǵamdyq uıymdar ókilderi quttyqtap, onyń jeke tulǵasynyń biregeıligi men álemdik ǵylymnyń damýyna qosqan zor úlesin atap ótti.
Murat Jurynov otandyq ǵylym ordasynyń basshysy retinde, elimizdegi eń alǵashqy ulttyq zertteý ýnıversıteti mártebesine ıe bolǵan jáne ınovasıalyq bilim men ǵylym jańalyqtaryn engize otyryp, agrarlyq salaǵa qajetti kadrlar daıarlaý barysynda eleýli jetistikterge jetken QazUAZÝ-ǵa da jan-jaqty qoldaý kórsetip keledi. Ýnıversıtettiń Ǵylymı keńesiniń sheshimimen Murat Jurynovqa «QazUAZÝ Qurmetti profesory» ataǵy berilip, ony QazUAZÝ Basqarma tóraǵasy-rektory Tilektes Espolov tapsyrdy.
Shara sońynda akademık Murat Jurynov dóńgelek ústel jumysyna belsene qatysqandary úshin barlyq áriptesterine alǵysyn bildirdi.
Dóńgelek ústel jumysyn qorytyndylaı kele, is-sharaǵa qatysýshylar talqylanǵan máseleler boıynsha ortaq pikirge kelip, Qazaqstandaǵy ǵylym men bilimniń rólin jańa sapaly deńgeıge kóterýge jáne eldiń ınovasıalyq damýyndaǵy serpiliske yqpal etetinine senim kórsetti.