Jańa oqý kezeńi bastalǵanda jaýyngerlik daıarlyqtan dástúrli túrde ótkiziletin taktıkalyq-saptyq sabaqtardyń qorytyndysy shyǵaryldy
QR Qorǵanys mınıstrliginiń dereginshe, sabaqtar úrdisine sáıkes, áskerler jaýyngerlik ázirliktiń joǵary deńgeıine keltirildi, dep habarlaıdy Almaty-akshamy.kz
Jeke quramdy habardar etý, basqarý pýnktterin jabdyqtaý, ózara is-qımyl jáne jan-jaqty qamtamasyz etý, sondaı-aq bólimshelerdi áskerı qoldanýǵa belgilengen aýdandarǵa jiberý máseleleri pysyqtaldy. Shtattyq kıim-keshektiń, baılanys quraldarynyń, jeke qorǵanys quraldarynyń, túngi aspaptardyń, nysanalardyń jáne basqa da áskerı múliktiń sany men jaı-kúıi tekserildi.
Áskerı bólimderdiń basshylyǵy áskerı bólimderge, bazalarǵa, áýeaılaqtar men áskerı qalashyqtarǵa shabýyl jasaý kezinde bólimshelerdiń, kezekshi kúshter men quraldardyń ushqyshsyz ushý apparattaryna jáne shartty qarsylastyń dıversıalyq toptaryna qarsy is-qımyl jasaýǵa daıyndyǵyn arttyrýǵa erekshe nazar aýdardy.
Jaýyngerlik daıarlyq aptalyǵynyń is-sharalar kesheninde Qorǵanys mınıstrligi basqa da áskerler men áskerı qurylymdardyń basqarý organdarymen ózara is-qımyldy uıymdastyrý máselelerine nazar aýdardy.
Sonymen, Bas shtabta, óńirlik qolbasshylyqtarda jáne Desanttyq-shabýyldaý áskerlerinde UQK Shekara qyzmetiniń jedel toptarymen memlekettik shekarany kúsheıtý boıynsha birlesken is-qımyldar naqtylanyp, is júzinde pysyqtaldy. Memlekettik kúzet qyzmetiniń laýazymdy adamdarymen Qarýly Kúshterdiń bólimshelerin strategıalyq mańyzdy obektilerdi kúzetýge jáne qorǵaýǵa tartý tártibi úılestirildi. QR Ulttyq ulanynyń ókilderimen birlesip, mindetterdi oryndaýǵa jumyldyrylatyn kúshter men quraldardyń ázirligin qarady.
Destrýktıvti uıymdardyń lańkestik is-áreketinen tónetin qaýipter men táýekelderdiń artyp kele jatqanyn eskere otyryp, Qarýly Kúshterdi terorızmge qarsy operasıalarda qoldaný máseleleri pysyqtaldy. Laýazymdy adamdar áskerlerdiń qozǵalý baǵyttaryn, qarýdy qoldaný tártibin, obektilerdi, tosqaýyl beketterdi, baılanysty uıymdastyrýdy jáne dabyldy basqarý, tamaqtandyrý, medısınalyq qamtamasyz etý, bólinetin jeke quram men tehnıkanyń sanyn naqtylady.
Aýmaqtyq qorǵanys brıgadalarynyń basshylyǵy tabıǵı jáne tehnogendik sıpattaǵy tótenshe oqıǵalardyń saldaryn joıýda TJM bólimshelerimen ózara is-qımyl uıymdastyrdy.
Áskerı basqarý organdarynda birlesken shtabtyq jattyǵý ótkizilip, onyń barysynda qaýip-qater artqan jaǵdaıda áskerı qaýipsizdikti qamtamasyz etý máseleleri pysyqtaldy.
Bul sharalardyń bári Qarýly Kúshter birlestikteriniń, quramalary men bólimderiniń jaýyngerlik ázirlik deńgeıin, basqa da áskerler men áskerı quralymdarmen jedel úılesimdiligin anyqtaýǵa múmkindik berdi.
Jergilikti áskerı basqarý organdarymen áskerge shaqyrýdy uıymdastyrý jáne jumyldyrý resýrstaryn jetkizý boıynsha aýqymdy jumys kólemi júrgizildi.
Bıyl 2 jeltoqsanda Qazaqstannyń Qarýly Kúshterinde jańa oqý jyly bastalǵany osyǵan deıin de aıtylǵan bolatyn. 2022 oqý jylyna daıarlyq barlyq sanattaǵy áskerı qyzmetshilerdiń belgilengen mindetterin oryndaýdaǵy ázirligin arttyrýǵa, áskerdiń odan ári kásibı ósýine baǵyttalǵan. Jaýyngerlik daıarlyq sharalarynyń 80 myńnan astam túrin ótkizý, ıaǵnı oqý-jattyǵýlar, is júzindegi oq atýlar, parashútpen sekirý, jattyǵý ushýlary, bólimshelerdiń dalalyq joryqtary, kemelerdiń teńizge shyǵýlary jáne jaýyngerlik mashınalardy júrgizý josparlanyp otyr.