Almaty oblysynan Aqtaý garnızonynyń áskerı bólimin jasaqtaýǵa áskerı avtomobıl tehnıkasy jiberildi
Áleýmettik jelilerde qazaqstandyq áskerı qyzmetshiler Ýkraınaǵa jiberiletini týraly aqparat tarady. QR Qorǵanys mınıstrligi bul aqparattyń shyndyqqa janaspaıtynyn málimdedi, dep habarlaıdy Almaty-akshamy.kz.
Bul rette Stopfake.kz Qazaqstan Respýblıkasy Qorǵanys mınıstrliginiń resmı túsindirmesin jarıalady.
«Beıbitshilik pen qaýipsizdikti qoldaý jónindegi halyqaralyq mindettemelerdi oryndaý úshin Qazaqstan Respýblıkasy Qarýly Kúshteriniń áskerı kontıngentin jiberý týraly sheshimdi el Prezıdentiniń tıisti usynysy negizinde Parlament qabyldaıdy. Qazaqstan áskerı qyzmetshilerin Ýkraınaǵa nemese odan basqa elge jiberý týraly suraý túsken joq jáne tıisti túrde qaralyp ta jatqan joq. Jeke quramdy aýystyrýǵa, oqytýǵa, jattyqtyrýǵa qatysty Qazaqstan Qarýly Kúshteriniń jaýyngerlik ázirligi men jaýyngerlik daıarlyǵyn arttyrý sharalary josparly túrde júrgiziledi. Sonymen qatar, bıyl 25 aqpan men 3 naýryz aralyǵynda Batys Qazaqstannan elimizdiń ońtústik baǵytynda jóndeý jumystaryn júrgizý úshin temir jol kóligimen áskerı tehnıkany josparly aýystyrý júzege asyrylyp jatqanyn habarlaımyz. Odan ózge, atalǵan kezeńde Almaty oblysynan Aqtaý garnızonynyń áskerı bólimin jasaqtaýǵa áskerı avtomobıl tehnıkasy jiberildi», – dep habarlady vedomstvodan.