Úkimet basshysy 2022 jyldyń sońynda iske qosylýy tıis «KamaTyresKZ» JSHS jańa shına zaýytynyń qurylys alańyna bardy.
Qaraǵandy oblysyna jumys sapary aıasynda QR Premer-Mınıstri Álıhan Smaıylov Saran qalasynyń ındýstrıalyq jáne ınfraqurylymdyq damý barysymen tanysty, dep habarlaıdy Almaty-akshamy.kz
Kásiporyn josparly qýattylyqqa shyqqannan keıin ónim, sonyń ishinde avtomobılderdiń bastapqy komplektasıasy úshin Qazaqstan naryǵyna, sondaı-aq EAEO elderine jetkiziledi dep kútilýde.
Sodan keıin Álıhan Smaıylov jylyna 1200 birlik avtobýs shyǵaratyn «QazTehna» JSHS zaýytyna bardy.
Búginde kásiporynda mektep avtobýstaryn shyǵarý jolǵa qoıylǵan, olar jańa oqý jylyna qaraı Qazaqstannyń toǵyz oblysyna beriledi. Sonymen qatar jyl sońyna deıin qoǵamdyq tasymaldaý úshin de avtobýstar shyǵarý josparlanǵan.
Sondaı-aq Premer-Mınıstrge ımportty almastyrý baǵdarlamasyn iske asyrý sheńberinde iske qosýylýy tıis «Meridian Company» JSHS bolashaq turmystyq tehnıka zaýytynyń jobasy tanystyryldy.
Budan ári Álıhan Smaıylov jyl sońyna deıin paıdalanýǵa berý josparlanyp otyrǵan RTB (rezeńke tehnıkalyq buıymdar) shaǵyn aýdanyndaǵy kóp qabatty úılerdi qalpyna keltirý barysymen tanysty.
Jalpy, Saran qalasynda turǵyn úı qurylysynyń qarqyny sońǵy úsh jyldyq kezeńde 260%-qa ulǵaıdy. 2022 jyly taǵy 250 páter paıdalanýǵa beriledi dep kútilýde.