Qazaqstan Jazýshylar odaǵynyń múshesi, oraldyq aqyn Munaıdar Balmolda tanymal estrada ánshisi Tóreǵalı Tóreálini sotqa bermekshi, dep habarlaıdy almaty-akshamy.kz.
Balmolda óziniń áleýmettik jelidegi paraqshasynda "Qazaqtyń jylqylary" atty óleńiniń túpnusqasyn jarıalap, oqyrmandarymen bólisti. Bul óleńge kompozıtor Altynbek Karesov án jazǵan. Alaıda, Tóreǵalı Tóreáli bul ándi ruqsatsyz ıemdenip alyp, mátinin ózgertip, óz atymen oryndaǵany úshin aqyn narazylyq bildirýde.
"Aqyrynda Tóreǵalı Tóreáliniń kózi túsipti. Túskeni qursyn, urlap alyp, sózin joq qylyp, onyń ornyna Qaınar Alakózovke sóz jazǵyzyp alyp, bir qojalyqtyń áni qylyp, aıtyp júr eken! Tik-tok-tan baıqap qalyp, eskertý jasadym. Jaqsylyqpen qoıa qoı, meniń avtorlyq quqyma qolyńdy suqpa dep! Joq, bul bala sózdi túsinbeıtin bolyp tur. YouTube arnasynda, óziniń paraǵynda osy án tur dep jigitter habarlasyp jatyr. Bul ánshi jigit Altynbekke (kompozıtorǵa) habarlasyp, ándi surapty. Altynbek óziniń kelisetinin, biraq Munaıdar aǵamnan ruqsat surańyz depti. Al Tóreǵalı meni adam eken demegen, aǵam eken demegen, ózim bilemge salypty. Al osynysy durys pa? Menen suraǵan da joq. Men ruqsat bermeıtin de edim. Sózin ózgertpeı aıtsa, onda oılanatyn edim. Ol meniń sózimdi joq qylǵan ǵoı. Án óleńime bola týdy, soǵan arnaıy jazyldy. Birinshi óleń týdy, soǵan meniń tapsyrysymmen án jazyldy. Sonda bul ánniń avtory kim? Sotqa bersem she? Meniń ánimdi ruqsatymsyz alǵany azdaı, onymen ózine jalǵan abyroı jınap júr. Muǵaljar jylqysy jaıly ándetip, bireýlerden aqsha alyp, meımanasy tasyp turǵan bolar. Osylaı meniń Qazaqtyń jylqylaryna, ıakı ultymyzdyń, halqymyzdyń asyl janýaryna arnaǵan ánimdi tapap ótpekshi, joq qylmaqshy", - deıdi Munaıdar Balmolda.
Bul jaǵdaı qoǵamda úlken rezonans týdyryp, kóptegen pikirtalastarǵa sebep boldy. Avtorlyq quqyq máselesi taǵy da kún tártibine qoıyldy. Tóreǵalı Tóreáliniń bul áreketi zańgerler men óner súıer qaýymnyń nazaryna ilikti. Aldaǵy ýaqytta sot prosesiniń qalaı órbıtini úlken qyzyǵýshylyq týdyrýda.