Qazaqstan Respýblıkasy İİM Almaty akademıasynyń kýrsanttary qazirgi ýaqytta Koreıa elinde álemniń jetekshi joǵary oqý oryndarynyń biri Shınhan ýnıversıtetiniń bazasynda bilim alyp jatyr.
Vedimistik bilim berý tarıhynda alǵash ret 10 kýrsant akademıalyq utqyrlyq baǵdarlamasy boıynsha qysqa merzimdi oqytýdan ótedi, dep habarlaıdy aqshamnews.kz Polisia.kz-ke silteme jasap.
Taǵylymdama yntymaqtastyq týraly memorandým sheńberinde júzege asyrylady jáne kıberqylmysqa qarsy turýǵa baǵyttalǵan.
– İshki ister mınıstrligi halyqaralyq baılanystardy keńeıtý jáne İİM oqý oryndarynyń bilim alýshylaryn syrtqy akademıalyq utqyrlyq baǵdarlamasyn iske asyrý úshin seriktes joǵary oqý oryndaryna jiberý týraly tapsyrma berdi. Osyǵan baılanysty biz 4-13 qarasha aralyǵynda Shınhan ýnıversıtetine 2-kýrs kýrsanttaryn iriktep, olardy qysqa merzimdi oqýǵa jiberdik, – dedi Qazaqstan Respýblıkasy İİM Maqan Esbolatov atyndaǵy Almaty akademıasy bastyǵynyń mindetin ýaqytsha atqarýshy Janat Dılbarhanova.
Taǵylymdama baǵdarlamasy negizgi jáne praktıkalyq oqytýdy, sonyń ishinde taekvondo ádisterin oqytýdy, sondaı-aq koreı tilin men mádenıetin úırenýdi qamtıdy. Sheteldik taǵylymdama aıasynda İİM Almaty akademıasynyń kýrsanttary saltanatty ashylý rásimine qatysty, oǵan Shınhan ýnıversıtetiniń Halyqaralyq qatynastar jónindegi prorektory Lı Desong jáne TMD elderimen yntymaqtastyq ortalyǵynyń dırektory Im Hevon qatysty. Sonymen qatar sheteldik oń tájirıbeni zerdeleý maqsatynda Inchhon qalasy polısıa departamentiniń bólimshelerine kóshpeli sabaqtar uıymdastyryldy, onda olar “112” qyzmetiniń ahýaldyq ortalyǵynyń jumysymen tanysty, kóliktegi polısıa basqarmasyna, krımınalısıkalyq jáne kıberlaboratorıaǵa bardy.
– Otandyq jáne álemdik tájirıbeni zerdeleý ishki ister organdary úshin joǵary bilikti kadrlardy daıarlaý úshin qajet. Bul kıberqaýiptermen kúresý salasyndaǵy eń jaqsy tájirıbelerdi qabyldaýǵa jaqsy múmkindik. Biz bul jobany damytýdy jalǵastyrýǵa nıettimiz jáne qazirgi ýaqytta akademıanyń syrtqy akademıalyq utqyrlyq baǵdarlamasyn basqa sheteldik seriktes JOO-larmen iske asyrý boıynsha uıymdastyrýshylyq máseleler sheshilýde, – dep tolyqtyrdy Janat Dılbarhanova.