32,8 mıllıon bastan astam maldy qystan aman-esen alyp shyǵý úshin oblys ákimdikterimen birlesip jem-shóp daıyndaý jospary aıqyndaldy.
Malǵa beretin ekpe shóp alqaby 3,2 mln gektardy quraıdy. Bul ótken jylmen salystyrǵanda 13 myń gektarǵa artyq, dep habarlaıdy Almaty-akshamy.kz.
Al malǵa jem retinde beriletin daqyldardyń egis alqaby - 2,6 mln gektar.
2021 jyldyń 22 qyrkúıegindegi jaǵdaı boıynsha, 23,2 mln tonna shóp jınaldy. Bul jospardyń (23,8 mln tonna) 98%-ǵa oryndalǵanyn kórsetedi. Budan bólek, 1,5 mln tonna (94%) pishendeme, 1 mln tonnadan astam (53%) súrlem, 2,9 mln tonna (61%) saban daıyndaldy.
Bıylǵy aýa raıynyń qolaısyzdyǵy mal azyǵy qoryn jınaýǵa edáýir qıyndyq týǵyzdy. Atap aıtqanda, qurǵaqshylyqtyń kesirinen jaıylymdardyń basym bóligi órtendi, tabıǵı shabyndyq jerlerde de shóp qalyń bolmady. Jaǵdaıdy turaqtandyrý úshin Mınıstrlik naqty sharalar qabyldaýda.
Jem-shóp daıyndaý máseleleri boıynsha jergilikti jáne ortalyq atqarýshy organdardyń qyzmetin úılestirý jónindegi respýblıkalyq jedel shtab qurylyp, jumys istep jatyr.