Otandyq vaksınanyń qaýqary ózgelermen teń dárejede
Qazaqtyń QazVac vaksınasy «delta» shtamynan tıimdi qorǵaıdy, dep habarlaıdy Almaty-akshamy.kz.
Mundaı nátıjelerdi QR BǴM Bıologıalyq qaýipsizdik problemalarynyń ǵylymı-zertteý ınstıtýtynyń ǵalymdary júrgizgen zertteýler kórsetti. Ǵalymdar beıtaraptandyrý reaksıasyna test ótkizdi, nátıjesinde otandyq QazVac vaksınasymen egilgender antıdenelerdiń joǵary deńgeıin kórsetti.
Vırýsty beıtaraptandyratyn antıdeneler klınıkalyq zertteýlerge qatysqan eriktilerdiń 90%-nan astamynda anyqtaldy.
Sondaı-aq zerthanalyq janýarlarǵa tájirıbeler júrgizildi. QazVac vaksınasıasynan keıin homáktarda paıda bolǵan antıdeneler koronavırýstyń «úndi» shtamyn beıtaraptandyrýǵa qabiletti ekendigi anyqtaldy.
«Biz QazVac vaksınasy qurǵan antıdenelerdiń «ýhan», «brıtandyq álfa», «úndilik delta» sıaqty koronavırýstyń jańa shtamdaryn beıtaraptandyrý qabiletin anyqtaý maqsatynda zertteý júrgizdik. Nátıjeler vaksınalaýdan keıingi antıdenelerdiń ımýnıtetti qalyptastyratynyn jáne vırýstyń úsh túrin de beıtaraptandyrýǵa qabiletti ekenin kórsetti. Sondaı-aq biz zerthanalyq janýarlarǵa tájirıbeler júrgizdik. «QazVac» vaksınasyn alǵan jáne vaksınalanbaǵan zerthanalyq homáktardy aldyq. Biraz ýaqyttan keıin olarǵa "delta" shtamyn juqtyrdyq. Nátıjesinde vaksınalanbaǵan homáktar koronavırýstyń delta shtamyn juqtyrdy. Al «QazVac» vaksınasymen egilgen janýarlar aýyrmaı, «delta» vırýsynyń shtamynan qorǵalǵan bolyp shyqty», – dep atap ótti QR BǴM ǴK Bıologıalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakará.
Alynǵan málimetter QazVac-tyń koronavırýstyń bar shtamdaryna qarsy tıimdiligin, onyń ishinde otandyq vaksınanyń "delta" shtamynan qorǵaý qabiletin rastady.
Sonymen qatar, koronavırýsyna qarsy QazVac vaksınasyn QR BǴM Ǵylym komıtetiniń Bıologıalyq qaýipsizdik problemalary ǵylymı-zertteý ınstıtýtynyń ǵalymdary ázirlegen. 60 jyldan astam tarıhy bar BQPǴZI-da bıologıalyq qaýipsizdik, vırýsologıa, mıkrobıologıa, ımmýnologıa salasynda jumys tájirıbesi mol.
Instıtýt ǵalymdary preparattardyń 60-tan astam túrin, sonyń ishinde 30 vaksınany, 16 test-júıeni jáne 15-ten astam túrli bıopreparattardy ázirlep, engizdi. Sońǵy 10 jylda ınstıtýt qus jáne shoshqa tumaýyna qarsy otandyq vaksınalardy daıyndaý tehnologıasyn jasady.