Premer-mınıstrdiń orynbasary – Ulttyq ekonomıka mınıstri Serik Jumanǵarınniń aıtýynsha, qurylys sektorynda qosylǵan qun salyǵynyń (QQS) ornyna ınfraqurylymdyq alym engizý josparlanyp otyr, dep habarlaıdy aqshamnews.kz
Bul ózgeris bastapqyda qurylys salasyn yntalandyrýdy kózdegenimen, onyń naryqtaǵy uzaqmerzimdi áseri qandaı bolmaq?
«Eń yqtımal nusqa retinde qurylys kompanıalarynan alynatyn ınfraqurylymdyq alymdy engizýdi qarastyryp otyrmyz. Onyń mólsheri – ázirge sharshy metrine 40-60 dollar kóleminde. Infraqurylymdyq júktemege baılanysty ózgeredi. Jańa salyq oılap tappaımyz. Qazir bul máseleler talqylanyp jatyr. Olar turǵyn úıdiń sanatyna qaraı retteledi», dedi S.Jumanǵarın.
Ulttyq ekonomıka mınıstriniń aıtýynsha, qurylys sektorynda QQS mólsherlemesi nólge teńestiriledi nemese tómendetiledi. Qazirgi qoldanystaǵy Salyq kodeksine sáıkes turǵyn úılerdi satý men jalǵa berý QQS-tan bosatylǵan. Alaıda jańa kodeks jobasynda bul jeńildik 2025 jylǵy 1 qańtarǵa deıin ǵana saqtalmaq.
Osydan keıin satylatyn jáne jalǵa beriletin barlyq turǵyn úıler QQS-qa baǵynýy múmkin. Demek qurylys kompanıalary jańa salyqty páter baǵasyna engizetin bolsa, baspana quny kúrt ósýi ǵajap emes.
Salyq mamandary bul ózgeristiń halyqqa aýyr soqqy bolatynyn alǵa tartady. Sebebi qurylysshylar ózderiniń qarjylyq júktemesin tutynýshyǵa júkteıtini anyq. Osylaısha, úı alýǵa nıetti azamattar QQS-ny qosymsha shyǵyn retinde kóterýi kádik. Bul ásirese, ıpotekalyq qaryz alýshylar úshin qıyndyq týdyrady, óıtkeni salyqtyń somasy nesıe mólsherine tikeleı áser etetini belgili. Sol sebepti, turǵyn úı baǵasy ósip, baspanaǵa muqtaj jandardyń jaǵdaıy qıyndaı túsýi múmkin.
Jaqynda ótken Prezıdenttiń kásipkerlermen kezdesýinde «BI Group» basshysy Aıdyn Raqymbaev osy máseleni kóterdi. Ol QQS mólsherlemesin turǵyn úı sanatyna qaraı saralaý qajet ekenin aıtty. Eger bul ózgeris qabyldansa, arzan baspana qoljetimdi bolyp qala beredi, al qymbat jyljymaıtyn múlikke salynatyn salyq joǵarylaıdy. Úkimet músheleri kásipkerdiń bul usynysy eskeriletinine ýáde berdi.
Ótken jumada Ulttyq ekonomıka vıse-mınıstri Arman Qasenov QQS-nyń turǵyn úı baǵasyna áserin tolyq boljaý múmkin emes ekenin málimdedi. Onyń aıtýynsha, qurylys naryǵyndaǵy baǵanyń basty retteýshisi – teńge baǵamy men ınflásıa deńgeıi.