Qostanaı qalasynyń tasqynǵa qarsy jedel shtabynyń málimetinshe, Qaratomar sý qoımasynan kóp kólemde sý aǵyzylýyna baılanysty, jaǵdaı ýshyqqan, dep habarlaıdy almaty-akshamy.kz.
Osy jyly, "Qazgıdromettiń" boljamy boıynsha, eń iri Joǵary Tobyl jáne Qaratomar sý qoımalaryna jalpy kóktem maýsymynda 450-den 700 mln tekshe metrge deıin sý túsýi yqtımal delingen-di. Munyń ózi — jyldyq ortasha 413 mln tekshe metr mejemen alǵandaǵy joramal edi. Alaıda sońǵy 2 kúnde qos qoımaǵa 1 mlrd tekshe metr sý jınaldy. Mamandar munshalyq aýqymdaǵy sýdy 1980 jyldan beri kórmegenderin aıtyp otyr.
Qazirgi ýaqytta, Qaratomar sý qoımasynyń shamadan tys tolyp ketýine baılanysty, artyq sýdy aǵyzý sekýndyna 10 teksheden bastalyp, 1,5 myń tekshe metrge deıin jetkizildi. Al munyń saldary qalanyń jaǵalaýǵa jaqyn aýmaqtaryna zor qaýip-qater tóndirip tur. Atap aıtqanda, "Dorojnık", "Sadovod", "Mıchýrınes" baý-baqsha qonystaryn jáne "Kolesnye rády" aýdanyn sý jaılaýy múmkin.
"Atalǵan aýmaqtardyń turǵyndary quziretti organdar birinshi talap etken sátten bastap, uıymdasqan túrde evakýasıaǵa kirisýi kerek. Bul sharada egde kisilerge, júris-turysy qıyn azamattar men balalarǵa erekshe kóńil bólý suralady. Aldyn ala qujattaryńyz ben alǵashqy qajettiligi bar zattaryńyzdy daıarlap qoıyńyzdar. Sizderge avtobýstar jiberilip, olar evakopýnktterge qatynaıdy. Ýaqytsha qonystarda as-aýqat jáne jatyn oryn ázirlengen", - delinedi qalalyq shtab habarlamasynda.
Qostanaı qalasy aýmaǵynda turǵyndardy evakýasıalaýǵa arnalǵan birneshe pýnkt ázirlenip qoıylǵan. Olar:
- QR İİM Akademıasynyń jataqhanasy;
- Qostanaı ındýstrıalyq-pedagogıkalyq koleji;
- Qostanaı avtomobıl kóligi koleji;
- Qostanaı qyzmet kórsetý salalary koleji;
- Qostanaı qurylys koleji;
- "Drýjba" profılaktorıasy;
- № 2 mektep-lıseı sport zaly;
- № 14 JBBM;
- S. Máýlenov atyndaǵy gımnazıa;
- № 19 jáne № 20 mektepter;
- Fızıka-matematıka lıseıi.
"Qurmetti qostanaılyqtar! Evakýasıa kezinde dúrbeleńge salynbaı, quqyq qorǵaý organdary men TJ qyzmetkerleriniń zań júzindegi barlyq talaptaryn oryndaýlaryńyzdy suraımyz! Eger tasqyn jeńil óter bolsa, adamdar qaldyryp ketken turǵyn úı alaptaryn tártip saqshylary kúzetetin bolady", - delinedi shtab úndeýinde.
Sondaı-aq qajet jaǵdaıda 102 nemese 109 telefon nómirleri arqyly tıisti oryndarǵa júginýge bolady.
Qostanaı aýdanynda tótenshe jaǵdaı rejımi engizildi
Qostanaı aýdany ákiminiń 2024 jylǵy 5 sáýirdegi № 4 sheshimimen, aýdan aýmaǵynda qalyptasqan gıdrologıalyq jaǵdaıǵa baılanysty, jergilikti aýqymdaǵy tabıǵı sıpattaǵy tótenshe jaǵdaı jarıalandy.
Ózenderdegi sý deńgeıine táýlik boıy monıtorıń júrgizilip jatyr. Jaǵalaýdy nyǵaıtý, erigen qar sýyn sorý jáne aǵyn baǵytyn burý jumystary jalǵasý ústinde.
Kóktal aýylynyń turǵyndary qaýipsiz jerge kóshirildi
Áýlıekól aýdanynda Terekti ózeni deńgeıiniń kóterilýine baılanysty Kóktal aýylynan 32 adam qaýipsiz jerge kóshirildi. Birinshi kezekte zeınetkerler men balalar aldyn ala evakýasıalanyp otyr. Evakopýnkt Áýlıekól bastaýysh mektebi janyndaǵy ınternatta ornalasqan.
Jergilikti atqarýshy organdar sý aǵyny aldyn qapshyqtarmen bógeý, sý sorǵylaý, ınertti materıaldardy úıý, toltyrý, aınalma arnalar jylý jumystaryn júrgizdi.