Qostanaı oblysynyń úsh eldi mekeninde órtpen kúres júrip jatyr. Oblys ákimdigi tótenshe jaǵjaı jarıalaý máselesin qarastyrýda, dep habarlaıdy Almaty-akshamy.kz Inform.kz-ke silteme jasap.
Bul týraly QR Tótenshe jaǵdaı mınıstrliginiń jedel shtaby málimet taratty.
«Qostanaı oblysynda bolǵan tabıǵı órt boıynsha 4 qyrkúıek saǵat 11.00-degi jaǵdaı mynadaı. 3 eldi mekende, M-36 Respýblıkalyq trassasynyń boıynda, sondaı-aq orman aımaǵynyń 8 ýchaskesinde órt sóndirý jumystary júrip jatyr», -delingen resmı málimette.
Órtti sóndirýge 110 tehnıka, 3 áýe kemesi, 5 órt poıyzy, jeke quramnyń 703 adamy jumyldyryldy: Onyń ishinde QR Tótenshe jaǵdaı mınıstrliginiń - 58 tehnıkasy men 359 adamy, áýeden sý tógetin qurylǵymen jabdyqtalǵan 2 tikushaq (Nur-Sultan q., Qostanaı, Aqmola, Soltústik Qazaqstan oblystarynan ákelindi) tartylǵan. Al İshki ister mınıstrliginiń jeke quramynan 33 adam, Ulttyq ulannyń (№6697 á/á) 150 adamy, 14 tehnıkasy jumyldyryldy. Sondaı-aq, Qorǵanys mınıstrligi jeke quramynan 20 adam; Orman sharýashylyǵynan - 32 tehnıka men 83 adam orman kúzetine tartyldy. «Qazavıaormanqorǵaý» mekemesinen 12 adam, 2 tehnıka, 1 áýe kemesi, jergilikti ákimdikten 3 tehnıka, 20 adam. «QTJ» aksıonerlik qoǵamynan 5 órt sóndirgish poıyz (21 adam)jumys istep jatyr.
«Amanqaraǵaı, Lesnoe, Ozernoe eldi mekenderinde órt sóndirý jumystary jalǵasyp jatyr. Halyqtyń qaýipsizdigin qamtamasyz etý úshin Ozernoe aýylynan (250 adam), Amanqaraǵaı aýylynyń soltústik bóliginen (1000 adam), Kalının aýylynan (228 adam) jáne Lesnoe aýylynan (363 adam) jalpy barlyǵy 1841 adam evakýasıalandy.
Jergilikti atqarýshy organdar evakýasıalanǵandardy Áýlıekól orta mektebi men Áýlıekól mektep-ınternatyna ornalastyrýdy uıymdastyrdy.
TJM jedel jelisine aqparattyq sıpattaǵy 18 qońyraý kelip tústi. Qostanaı oblysy tótenshejaǵdaılar departamentiniń 2 psıhology Áýlıekól aýdanynyń evakopýnktinde halyqqa shuǵyl psıhologıalyq kómek kórsetip jatyr.
Novonejenka aýylynda zardap shekken halyqty qabyldaıtyn 9 shatyr quryldy.
10 adam jaraqat alyp, kúıik shalyp, ýlanǵan. Iaǵnı, turǵyndar arasynda 5 adam, orman sharýashylyǵynyń bir qyzmetkeri, 1 ákimdik qyzmetkeri, Tótenshe jaǵdaı mınıstrliginiń 3 qyzmetkeri zardap shekken. Olardyń tórteýi ortalyq aýdandyq aýrýhanada em alyp jatyr. Al 6 adam tekserýden ótip, kómek alǵannan keıin úıige jiberildi. Órt sóndirý kezinde qutqarýshylar 1935 jyly týǵan er adamnyń máıitin tapty.
Qostanaı oblysynyń ákimdigi jergilikti aýqymdaǵy tótenshe jaǵdaıdy jarıalaý máselesin pysyqtaýda», -dep jazady jedel shtab.