QR Premer-Mınıstri Álıhan Smaıylov Qostanaı oblysyndaǵy alapat tabıǵı órtterdiń saldaryn joıý máseleleri boıynsha jedel keńes ótkizdi. Bul týraly Almaty-akshamy.kz primeminister.kz-ke silteme jasap habarlaıdy.
Tótenshe jaǵdaılar birinshi vıse-mınıstri Ibragım Kúlshimbaev kúrdeli meteorologıalyq jaǵdaıǵa, aýa temperatýrasynyń 36 gradýstan asýyna baılanysty Qostanaı oblysynda, ásirese orman alqaptarynda kúrdeli órt jaǵdaıy qalyptasqanyn baıandady. 43 myń ga orman sharýashylyǵy órtke orandy.
Qazirgi ýaqytta 1 841 adam qaýipsiz jerge kóshirilip, ystyq tamaqpen qamtamasyz etildi. Jedel jeli ashylyp, zardap shekkendermen psıhologtar jumys istep jatyr. 10 adam zardap shekti, bir adam qaıtys boldy.
108 úı-jaı joıylyp, búlingen. Órt sóndirýge jeke quramnan 600-den astam adam jáne 100-ge jýyq tehnıka jumyldyryldy. Tikushaqtar iske qosyldy. Jedel shtab jumys istep jatyr, QR TJM basshysy oqıǵa ornynda júr.
Úkimet basshysy Tótenshe jaǵdaılar, Indýstrıa jáne ınfraqurylymdyq damý, Aýyl sharýashylyǵy, Qarjy mınıstrlikterine jáne Qostanaı oblysynyń ákimdigine turǵyndar men aýyl sharýashylyǵyna keltirilgen zalaldy baǵalaýdy tapsyrdy.
Qarjy jáne Ulttyq ekonomıka mınıstrligine Úkimettiń rezervinen órtten keltirilgen zalaldy óteýge qarajat bólý týraly qaýly jobasyn daıyndaý tapsyryldy.
Sonymen qatar Álıhan Smaıylov baspanasynan aıyrylǵan azamattar úshin jańa turǵyn úıler salý jumysyn shuǵyl bastaýdy tapsyrdy.
«Qurylysty qysqa merzimde aıaqtaý úshin jedel jumys isteýimiz kerek. Bul másele – Prezıdenttiń jeke baqylaýynda», — dedi Álıhan Smaıylov.
Sonymen qatar Indýstrıa jáne ınfraqurylymdyq damý mınıstrligine Qostanaı oblysynyń zardap shekken aýdandarynda kólik qatynasyn qalpyna keltirý jáne barlyq ınjenerlik jáne ınfraqurylymdyq obektilerdiń úzdiksiz jumys isteýin qamtamasyz etý tapsyryldy.
Aýyl sharýashylyǵy mınıstrligine oblys ákimdigimen birlesip, qajet bolǵan jaǵdaıda zardap shekken fermerlerge jáne jeke qosalqy sharýashylyq ıelerine kómek kórsetý tapsyryldy.
Sondaı-aq Álıhan Smaıylov Densaýlyq saqtaý mınıstrligine zardap shekkenderge qajetti medısınalyq kómek kórsetýdi, Eńbek jáne halyqty áleýmettik qorǵaý mınıstrligine oblys ákimdigimen birlesip, áleýmettik kómek kórsetýdi, İshki ister mınıstrligine evakýasıa aımaqtarynda azamattardyń qoǵamdyq qaýipsizdigin jáne múlkiniń búlinbeýin qamtamasyz etýdi, sondaı-aq halyq arasynda otty abaısyz paıdalanǵany úshin jaýapkershilik týraly túsindirý jumystaryn kúsheıtýdi tapsyrdy.