Parlament Senatynyń jalpy otyrysynda «Derbes derekter almasý salasyndaǵy ákimshilik máseleler boıynsha ózara quqyqtyq kómek týraly kelisimdi ratıfıkasıalaý týraly» zańy qabyldandy.
Bul kelisim TMD elderiniń ókiletti organdary arasynda jasaldy. Qujat aqparat almasýdyń quqyqtyq negizin anyqtaıdy. Kelisimge 2020 jyly jeltoqsanda Memleket basshylary keńesiniń otyrysynda qol qoıyldy, dep habarlaıdy Almaty-akshamy.kz QazAqparatqa silteme jasap.
«Kelisimdi ratıfıkasıalaý TMD elderinen azamattyqtyń bolýy nemese bolmaýy, jeke basty kýálandyratyn qujattar, kóshi-qon esebinde turǵan adamdar, sheteldikterge osy elderge kelýge jáne onda bolýǵa berilgen vızalar, qylmystyq nemese ákimshilik jaýapqa tartylǵany týraly málimetterdi alýǵa bolady. Atalǵan qujat qos azamattyqty boldyrmaýǵa múmkindik beredi», - dedi QR İshki ister mınıstriniń birinshi orynbasary Marat Qojaev.
Budan basqa kelisim boıynsha qosymsha aqparatty alýǵa bolady. Basqa elden alynǵan jeke basyn kýálandyratyn qujattardy joǵaltqan kezde adamnyń kim ekenin, azamattyń shetelde turatyn jerin anyqtaýǵa múmkindik beredi. Sonymen qatar, ákimshilik nemese qylmystyq quqyq buzýshylyq jasaǵany úshin adamdardy jaýapqa tartý týraly málimetter quqyqtyq kómek kórsetý aıasynda paıdalanylýy múmkin. Bul aqparattardy ókiletti organdar suraý salý arqyly alady. Jaýap merzimi eki aıdan aspaýy tıis.
«Bul rette kelisimde azmattarǵa qatysty málimetterdiń qupıalyǵy, ol derekterdi paıdalanýǵa shekteýler, sondaı-aq suraý salýdy qanaǵattandyrmaıtyn talaptar naqty jazylǵan. Qujatty ratıfıkasıalaý TMD elderindegi quzyretti organdardyń ózara is-qımylynyń tıimdiligin arttyrýǵa múmkindik beredi. Zań jobasy elimizdiń barlyq múddeli memlekettik organdarymen kelisildi», - dedi M. Qojaev.