Qorǵas keden beketinde qarjyny zańsyz alyp ótpek bolǵandar ustaldy.
«SHYHO-Qorǵas» keden beketinde valútany zańsyz tasymaldaýǵa tosqaýyl qoıdy dep habarlaıdy Almaty-akshamy.kz Memlekettik kirister komıtetine silteme jasap.
El shebinde, jel ótinde júrgen shekarashylar óz qyzmetterine qylaý túsirgen emes. Ony kezekti ret dáleldedi. Bıyl 1-20 shilde aralyǵynda «SHYHO-Qorǵas» keden beketiniń qyzmetkerleri shekarashylarmen birlesip zańsyz áreketti áshkereledi.
Kedende qyzmettik ıtterdi paıdalana otyryp, jalpy somasy 40,2 myń AQSH dollary, 17,8 mln teńge jáne 60,0 myń ıýándi deklarasıasyz tasymaldaǵan 5 fakti anyqtaldy.
Eskerer jaıt, 10 myń dollardan astam qarjysy bar adam kedendik deklarasıany toltyrýy tıis.
Prezıdenttiń 2022 jylǵy 14 naýryzdaǵy №830 «Qazaqstan Respýblıkasynyń qarjylyq turaqtylyǵyn qamtamasyz etý jónindegi sharalar týraly» Jarlyǵyna sáıkes, 10 000 AQSH dollarynan asatyn somada qolma-qol shetel valútasyn áketýge tyıym salynǵan.