Jańa sıfrlyq dáýirde onyń geosaıası mańyzy zor.
Qorǵanys mınıstrliginde vedomstvo basshysy, general-leıtenant Rýslan Jaqsylyqovtyń basshylyǵymen áskerı maqsattaǵy aqparattyq-kommýnıkasıalyq ınfraqurylymnyń biryńǵaı operatoryn qurý máselesi jóninde keńes ótti, dep habarlaıdy Almaty-akshamy.kz.
Keńeske Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın, «Qazaqstan Ǵarysh Sapary» UK» AQ jáne «Ghalam» JSHS basshylyǵy, mınıstrliktiń qurylymdyq bólimsheleriniń ókilderi qatysty.
Qorǵanys vedomstvosynan mınıstrdiń orynbasary, general-leıtenant Sultan Qamaletdınov, Strategıalyq damý, Aqparattandyrý, Baılanys, Memlekettik qupıalardy qorǵaý departamentteriniń, Áskerı-ǵaryshtyq baǵdarlamalar ortalyǵynyń bastyqtary jáne «Qazaqstan GAJ Ortalyǵy» AQ basshylyǵy qatysty.
«Memleket basshysynyń tapsyrmasyn oryndaý úshin Qorǵanys mınıstrligine áskerı maqsattaǵy aqparattyq-kommýnıkasıalyq ınfraqurylymnyń biryńǵaı operatoryn qurý tapsyryldy. Qorǵanys mınıstrligi «Qazaqstan Respýblıkasynyń qorǵanysy jáne Qarýly Kúshteri týraly» zańǵa túzetýler engizdi», – dedi Qorǵanys mınıstri.
El Prezıdenti halyqqa Joldaýynda aýqymdy aqparattyq-telekommýnıkasıalyq áleýetti iske asyrý qajettigin atap ótti. Jańa sıfrlyq dáýirde onyń geosaıası mańyzy zor. Qazaqstan Eýrazıa keńistiginiń eleýli bóliginde ortalyq sıfrlyq habqa aınalýǵa tıis.
General-leıtenant Rýslan Jaqsylyqov atap ótkendeı, áskerı maqsattaǵy aqparattyq-kommýnıkasıalyq ınfraqurylym obektilerin qurý, engizý, damytý, ıntegrasıalaý jáne júıelik-tehnıkalyq qyzmet kórsetý biryńǵaı operatordy qurýdaǵy maqsat bolyp tabylady. Biryńǵaı operator aqparattyq-kommýnıkasıalyq tehnologıalar salasyndaǵy talaptardyń saqtalýyn, aqparattyq qaýipsizdikti, anyqtalǵan kemshilikterge jedel den qoıýdy jáne olardy ýaqtyly joıý jóninde sharalar qabyldaýdy, sondaı-aq aqparattyq-kommýnıkasıalyq qyzmetter kórsetý kezinde elektrondyq aqparattyq resýrstardy saqtaý qaýipsizdigin, aqparattyq júıelerge tehnıkalyq qyzmet kórsetýdi jáne olardy súıemeldeýdi qamtamasyz etedi.
Biryńǵaı operator retinde «Qazaqstan GAJ Ortalyǵy» aksıonerlik qoǵamyn belgileý usynylyp otyr. Bul ortalyq 15 jyldan astam ýaqyt boıy Qorǵanys mınıstrliginiń aqparattyq júıelerin tehnıkalyq turǵyda qoldaýdy jáne súıemeldeýdi júzege asyryp keledi.
Munan ózge, keńes barysynda joǵary jıilikte Jerdi qashyqtan zondtaýmen qamtý jáne paıdalanýǵa berý, túsirilimderdi taratýǵa shekteýlerdi alyp tastaý jónindegi jobany iske asyrýdyń tehnıkalyq sheshimi men tetigi boıynsha máseleler de talqylandy.