Qazaqstanda táýligine 1,7 mıllıard barel munaı óndiriledi.
Aǵymdaǵy jyldyń qańtar aıynda Qazaqstanda 6,7 mln tonna shıki munaı óndirildi, bul bir jyl burynǵydan 14,2%-ǵa artyq, dep habarlaıdy Almaty-akshamy.kz Energyprom.kz saıtyna silteme jasap.
Óńirlik turǵydan alǵanda óndiristiń eń úlken kólemi dástúrli túrde Atyraý oblysyna tıesili: 4,6 mln tonna, ıaǵnı 23,4% artyq. Úzdik úshtikke sonymen qatar Mańǵystaý (1,4 mln tonna, jylyna 0,5% artyq) jáne Aqtóbe (395,5 myń tonna) oblystary kiredi.
Negizgi aımaqtarda «Nort Kaspıan Opereıtıng Kompanı N.V.» fılıaly, «Teńizshevroıl» JSHS, «Embimunaıgaz» AQ (Atyraý oblysy), «Qarajanbasmunaı» AQ, «Mańǵystaýmunaıgaz» AQ, «Qaraqudyqmunaı» JSHS (Mańǵystaý oblysy) sıaqty kompanıalar jumys isteıdi.
Jalpy, 2021 jyldyń qańtar-jeltoqsan aılarynda kásiporyndar 73,7 mln tonna shıki munaı óndirdi, bul ótken jyldyń osy kezeńimen salystyrǵanda 1%-ǵa artyq.
2021 jyldyń qańtar-jeltoqsan aılarynda Qazaqstan 31,1 mıllıard dollarǵa 65,7 mıllıon tonna shıki munaı eksporttady. Fızıkalyq mánde tómendeý 6,9%-dy qurasa, aqshalaı túrde, kerisinshe, 31,2%-ǵa ósý baıqaldy.
TMD elderine 54,6 mln dollarǵa bar bolǵany 131,6 myń tonna shıki munaı jóneltildi. Bul kólemdegi munaıdy Reseı men Ózbekstan ózara teń bólip alǵandaı.
TMD-dan tys elderge Qazaqstan 31 mıllıard dollarǵa 65,6 mıllıon tonna shıki munaı eksporttady. Onyń basym bóligi dástúrli túrde Italıaǵa jóneltildi: 17,9 mln tonna, bir jyl burynǵydan 8,9%-ǵa az. Úzdik satyp alýshy úshtikte Nıderlandy men Fransıa da bar. Elimizdiń munaıyn alýshy úzdik bes eldiń qataryna Qytaı men Túrkıa kiredi.
2021 jylǵy jeltoqsannyń aıaǵynda shıki munaı men bıtýmdy mıneraldardan alynǵan shıki munaı ónimderin eksportqa jetkizý baǵasy bir aıda 1,6%-ǵa, bir jylda – 82,1%-ǵa, 2015 jylǵy jeltoqsanda – 2,2 esege ósti. Jyldyq dınamıka boıynsha baǵa TMD elderi boıynsha 17,7%-ǵa, al TMD-dan tys elder úshin 82,1%-ǵa ósti.
Jalpy, 2021 jylǵy qańtar-jeltoqsanda bul sektordaǵy baǵalar 2020 jyldyń sáıkes kezeńimen salystyrǵanda 53,1%-ǵa ósti.
Investfunds málimetinshe, 2022 jyldyń 4 naýryzynda munaı barreliniń quny 118,1 dollardy qurady. Bir táýlikte barel baǵasy 6,9%-ǵa, bir aıda – 32%-ǵa, úsh aıda – 69%-ǵa, bir jylda – 77%-ǵa qymbattady.
2022 jyly kúndelikti munaı óndirý kólemi boıynsha elder reıtıńinde Qazaqstan 127 eldiń ishinde 18-orynǵa turaqtady. Qazaqstan táýligine orta eseppen 1,7 mlrd barel munaı óndiredi. Bul reıtıńtiń kóshbasshylary AQSH, Saýd Arabıasy jáne Reseı memleketi.
TMD elderiniń ishinde Qazaqstan Reseıden keıingi orynda tur. Ázirbaıjan – 843,5 mln barel, Túrkimenstan – 266,4 mln barel, Ózbekstan – 71,5 mln barel, Belarýs – 32,6 mln barel, Qyrǵyzstan – 972 myń barel, Tájikstan – 173 myń barel munaı óndiredi.
Ókinishke qaraı, Reseıdiń Ýkraınadaǵy «arnaıy áskerı operasıasy» bastalǵannan keıin quldyraǵan teńge baǵamyn ustap turýǵa reıtıńtegi oryndar da, munaı baǵasy da kómektese almady.