Nátıjesinde 13 sıfrlyq ofıser irikteledi.
Bul laýazymdarǵa jarıalanǵan baıqaýdyń birinshi kezeńine Qorǵanys mınıstrliginiń, Bas shtabtyń, Qarýly Kúshterdiń jáne zapastaǵy ofıserlerdiń arasynan 90-ǵa jýyq áskerı qyzmetshi qatysty, dep habarlaıdy Almaty-akshamy.kz.
«Baıqaý sharttary boıynsha osy pozısıaǵa úmitkerdiń áskerı basqarý organdaryndaǵy basshy laýazymdarda eki jyldyq tájirıbesi nemese bes jyl áskerı qyzmette ótili bolýǵa tıis. Qatysýshylar sanyn eskere otyryp, olarǵa Qorǵanys mınıstrliginiń áskerı bólimderi men bólimshelerinde avtomattandyrylǵan jumys oryndary uıymdastyryldy. Vedimistik jelige qosylyp, qajetti alańdardy toltyryp, úmitkerler onlaın-testileýden ótti», - delingen Qorǵanys mınıstrliginiń baspasóz qyzmetiniń habarlamasynda.
Qorǵanys mınıstrliginiń Aqparattandyrý departamenti ázirlegen baıqaýdyń birinshi kezeńin ótkizý algorıtmi testileýdiń tórt túrin tirkeýdi jáne ótkizýdi qarastyrdy. Olarǵa eki saǵat berildi.
Birinshi kezeń barysynda zańnama normalaryn bilý deńgeıi, ofıserlerdiń zıatkerlik áleýeti men aqparattyq saýattylyǵy tekserildi. Sonymen qosa SHL-testileý suraqtary aýyzsha, sandyq jáne logıkalyq mazmunda boldy. Jalpy synaqtaǵylar 100 suraqqa jaýap berýi kerek edi.
«Testileý nátıjesine qaraı 51 adam iriktelip alyndy. Endi olar Sıfrlyq damý, ınovasıalar jáne aeroǵarysh ónerkásibi mınıstrliginiń sıfrlyq úkimetti qoldaý ortalyǵynyń jáne ozyq IT-kompanıalardyń ókilderinen turatyn táýelsiz komısıanyń jobasyn tanystyrýy tıis», – dep túsindirdi Qorǵanys mınıstriniń orynbasary Darhan Ahmedıev.
Prezentasıa másele – sheshim – qorytyndy algorıtmge negizdelgen. Usynystar men ıdeıalaryn sıfrlyq sarapshylar maquldaǵan úmitkerler óz jobalaryn Qorǵanys mınıstrliginiń basshylyǵymen áńgimelesý barysynda tanystyratyn bolady.
Nátıjesinde 13 sıfrlyq ofıser irikteledi. Uıymdastyrýshylyq jáne shtattyq qurylymǵa sáıkes olar Qorǵanys mınıstrliginde – bir, Bas shtabta – úsh jáne Qarýly kúshterde – toǵyz sıfrlyq ofıser laýazymdaryna bólinedi.
Kelesi kezeńdi ótkizý kúni men ýaqyty qosymsha habarlanatyn bolady. Alǵashqy irikteýden ótkenderge «Sıfrlyq ofıser» jobasynyń sall-ortalyǵyna 46 147 telefonyna habarlasýy qajet.