14 elden 350-den astam delegat qatysýda.
Almatyda «NEW SILK WAY» V Halyqaralyq kóliktik-logıstıkalyq bıznes forýmy óz jumysyn bastady, dep habarlaıdy Almaty-akshamy.kz Egemen.kz silteme jasap.
Qazaqstannyń kólik aptalyǵy sheńberinde uıymdastyrylǵan alqaly basqosýǵa 14 elden 350-den astam delegat qatysýda.
Elimizdiń tranzıttik áleýeti men ınvestısıalyq tartymdylyǵyn arttyrý maqsatyndaǵy forým jumysy «Qazirgi jaǵdaıdaǵy kóliktik-logıstıkalyq áleýetti damytý» paneldik sesıasymen ashyldy.
Jıyndy Indýstrıa jáne ınfraqurylymdyq damý vıse-mınıstri Almaz Ydyrysov ashyp, Qazaqstannyń qazirgi geosaıası jaǵdaıdaǵy Azıa men Eýropa arasyndaǵy mańyzdy qurlyq dálizi ekenin aıtty.
«Búginde elimizde kólik dálizderiniń tarmaqtalǵan jelisi bar. Qazaqstannyń álemdik naryqqa shyǵýǵa múmkindik beretin negizgi halyqaralyq kólik jelilerimen baılanysy óte tyǵyz. Qoldanystaǵy tranzıttik baǵyttardy damytý jáne jańalaryn qurý, logıstıkalyq ınfraqurylymdy jańǵyrtý bizdiń elder úshin tıimdi jáne osy taraptaǵy jumysty odan ármen jalǵastyrý óte mańyzdy»,- dep atap ótti vıse-mınıstr.
Qazaqstan «Batys Eýropa – Batys Qytaı» tranzıttik kólik dálizi, Lánúngan teńiz portyndaǵy (QHR) logıstıkalyq termınal, «Qorǵas-SHyǵys qaqpasy» AEA syndy jobalardy tabysty júzege asyrdy. Sondaı-aq qazirgi kúnde Transkaspıı halyqaralyq kólik baǵyty negizinde teńiz porttary arqyly konteınerlik tasymaldaý kólemin arttyrý boıynsha jumystar jalǵasýda. Osyǵan oraı Aqtaý teńiz porty bazasynda konteınerlik hab qurylady.
«Konteınerlik habty qurý jobasy «Qýatty óńirler – el damýynyń draıveri» ulttyq jobasyna engizildi. Jobanyń jalpy quny 10,4 mlrd teńgeni quraıdy. Ony iske asyrý Transkaspıı halyqaralyq kólik baǵyty boıynsha júkterdi tasymaldaý jyldamdyǵyn jáne Túrkmenbashy – Aqtaý – Qytaı tranzıttik dáliziniń ótkizý qabiletin damytýǵa múmkindik bermek», -dedi óz sózinde Almaz Ydyrysov.
Joba nátıjesinde 2025 jylǵa qaraı Aqtaý teńiz porty arqyly júk tasymaldaý kólemi 40 myńnan 133 myń jıyrma fýttyq ekvıvalentke artpaq. Budan bólek, logıstıkalyq marshrýttardy jalǵaıtyn 10 parom, 18 júk tıeý tankerine arnalǵan flot qurylysyn júzege asyrý jumystary qolǵa alynýda.
Sonymen qatar Darbaza – Maqtaaral temir jol jelisiniń qurylysy men Dostyq – Moıynty temir jol dálizin jańǵyrtý jobasyn iske asyrý josparlanyp otyr. Bul jobalardy iske asyrý Reseı – Ortalyq Azıa, Qytaı – Eýropa tranzıttik baǵyttary boıynsha júkterdi tasymaldaý jyldamdyǵyn birneshe esege arttyrýǵa múmkindik bermek. Osy rette aıta keterligi, jyl basynan beri Qytaı – Eýropa – Qytaı baǵytyndaǵy tranzıttik konteınerlik júkter aǵyny ótken jyldyń sáıkes kezeńimen salystyrǵanda 4 paıyzǵa artyp, 499 myń JFE-ni qurady.
Qazirgi ýaqytta elimizde transporttyq ınfraqurylymdy jańǵyrtý jumystary qarqyndy júrgizilýde. QR IIDM vıse-mınıstriniń aıtýynsha, barlyq kólik dálizderindegi qurylys jumystary 2030 jylǵa qaraı tolyq aıaqtalady.
Sonymen qatar forýmda kólik salasyndaǵy jańa múmkindikter, halyqaralyq avtomobıl tasymaldary, teńiz jáne temirjol logıstıkasy men salada kadrlar daıarlaý máseleleri talqylandy.
Eki kúnge jalǵasatyn Halyqaralyq kólik-logıstıkalyq bıznes forýmy aıasynda «Kólik jáne logıstıka» Qazaqstandyq halyqaralyq kórmesi de ótedi.