Qazaqstan Respýblıkasynyń Qorǵanys mınıstrligi Almatyda "Industrial AI: jańa dáýirge arnalǵan tehnologıalar" uranymen bastalǵan Digital Almaty 2025 VII Halyqaralyq sıfrlyq forýmynda qorǵanys jáne qaýipsizdik salasyndaǵy zamanaýı sıfrlyq bastamalardy tanystyrdy, dep habarlaıdy aqshamnews.kz.
İs-sharada Qorǵanys mınıstriniń orynbasary Darhan Ahmedıev EAEO elderi úkimet basshylarynyń aldynda qorǵanys salasynda jasandy ıntellekti qoldaný týraly baıandama jasady. Forýmda usynylǵan negizgi jobalardyń biri áskerı esepti avtomattandyrýǵa arnalǵan "Srochnık 2.0" júıesi boldy. Bul áskerge shaqyrylǵandarmen jumystyń ashyqtyǵyn arttyrýǵa, jumyldyrý daıyndyǵyn ońtaılandyrýǵa jáne azamattardyń qajetti aqparatqa qol jetkizýin jeńildetýge múmkindik beredi. Júıe derekterdi avtomatty túrde taldaıdy, áskerge shaqyrylýshylardyń sanattaryn anyqtaıdy, SMS habarlamalar jiberedi jáne áskerge shaqyrylýshylardyń qaı ásker túrlerine jiberýge bolatynyn aıtady.
– Ótken jyldardan aıyrmashylyǵy, Digital Almaty 2025 jasandy ıntellekti qoldanatyn sheshimderge baǵyttalǵan. Osyǵan baılanysty bizdiń baıandamamyz da, usynylǵan stend te qorǵanys salasyndaǵy sıfrlyq ınovasıalarǵa arnalǵan. Jasandy ıntellekt shaqyrý naýqany men úgit-nasıhat jumystary aıasynda ǵana emes, sonymen qatar áskerı qyzmetshilerdiń kúndelikti ómirin sıfrlyq transformasıalaýda da belsendi qoldanylady. Ol birqatar tapsyrmalardy oryndaýdy jeńildete otyryp, kúndelikti prosesterdi avtomattandyrýǵa kómektesedi, — dep atap ótti Darhan Ahmedıev.
Qorǵanys salasyna ozyq tehnologıalardy engizýge baǵyttalǵan Defence Tech baǵytyn damytýǵa erekshe nazar aýdaryldy. Onyń aıasynda hakatondar, dóńgelek ústelder, strategıalyq sesıalar jáne akselerasıalyq baǵdarlamalar ótkiziledi. 2023 jyly Astana Hub-ta Defense Tech keńsesi ashyldy, al jaqyn arada Almatydaǵy Ofıserler úıinde ókildik ashý josparlanǵan. Bul tehnologıalyq kompanıalardy qorǵanys ınovasıalaryna belsendi tartýǵa múmkindik beredi.
Budan bólek forýmda Qazaqstannyń Qarýly Kúshterine ozyq tehnologıalardy ázirleý men engizýdi qoldaıtyn Defense Tech qorǵanys qaýipsizdigi salasyndaǵy ınovasıalardy damytý ortalyǵynyń, Damý ınstıtýtynyń stendi tanystyryldy.
Qorǵanys salasyndaǵy sıfrlyq sheshimderdiń damýy Qorǵanys mınıstrliginiń jańa sıfrlyq dáýirde eldiń qaýipsizdigi men qorǵanys qabiletin joǵary deńgeıde qamtamasyz ete otyryp, ozyq tehnologıalardy engizýge degen umtylysyn kórsetedi.