Almaty sport nysandaryn basqarý jónindegi dıreksıasynyń málimetinshe, 2023 jyly «Medeý» muz aıdyny men onyń ınjenerlik jelileriniń tehnıkalyq jaǵdaıyn tekserý jáne baǵalaý jumystary júrgizildi. Bul zertteýdiń maqsaty – jańǵyrtý tujyrymdamasy men jobalaý-smetalyq qujattamany ázirleý. Saraptama qorytyndysyna sáıkes, qazirgi ýaqytta muz aıdyny jappaı syrǵanaý úshin qaýipsizdik talaptaryna saı keledi.
Jańǵyrtý boıynsha negizgi baǵyttar:
«Medeý» BTSK aýmaǵyn kórkeıtý jumystary: muz aıdynynyń batys syzyǵy boıymen serýendeý aleıasyn qurý, aıdyn aınalasynda jaıaý júrginshilerge arnalǵan baspaldaqtar ornatý, ońtústik betkeıde, Esentaı ózeniniń oń jaǵalaýy boıymen kórkeıtý jumystaryn júrgizý, irgeles aýmaqty jaqsartý men múmkindigi shekteýli azamattarǵa yńǵaıly bolýy úshin ońtústik-shyǵys jáne ońtústik-batys bóliginde eki jedel saty ornatý kózdelgen.
Injenerlik júıelerdi jańǵyrtý: tońazytqysh jabdyqtary men muz jabynyn sýytý júıesin jańartý, qubyr jelilerin tolyq aýystyra otyryp, tehnologıalyq taqtany jańartý, jylytý júıesin gazǵa aýystyrý, jylytý jáne kórermenderge arnalǵan oryndardy jylytý júıesin jańǵyrtý, energıany únemdeýdi arttyrý jáne kelýshilerge qolaıly jaǵdaı jasaý úshin ınfraqurylymdyq elementterdi jańartý, ınjenerlik júıeler, komýnıkasıalar men elektr jabdyqtaryn tolyqtaı aýystyrý josparlanyp otyr.
Sonymen qatar, «Medeý» qonaq úıin tolyq rekonstrýksıalaý josparǵa engen.
Rekonstrýksıalaý barysynda «Medeý» muz aıdynynyń tarıhı kelbeti men mádenı murasyn saqtaý basty basymdyq bolyp qala beredi.