Oqý jylynyń bastalýyna baılanysty general-polkovnık Rýslan Jaqsylyqov Qorǵanys mınıstrliginiń áskerı joǵary oqý oryndary basshylyǵynyń jáne profesorlyq-oqytýshylar quramynyń qatysýymen keńes ótkizdi, dep habarlaıdy aqshamnews.kz sala mınıstrligine silteme jasap.
Prezıdenttiń Qazaqstan halqyna Joldaýynda elimizdiń kadrlyq áleýetin dáıekti túrde arttyrý jáne bolashaq mamandyqtary boıynsha mamandar daıarlaý mindeti qoıyldy. Bul «jasandy ıntellekt» tehnologıalary men júıeleriniń ár túriniń qarqyndy damýymen sıpattalatyn áskerı salaǵa da qatysty.
Qorǵanys vedomstvosynyń basshysy qarýly qaqtyǵystardyń erekshelikterine toqtaldy, munda búginde jańa tehnologıalar, elektrondy kúres júıeleri, soqqy berýshi jáne kómekshi quraldardy robottandyrý, sondaı-aq ásker bólimshelerin logıstıkalyq qoldaý sheshýshi ról atqarady dedi.
– Búginde qalyptasqan, eski ádiske súıenip, eldiń qorǵanys qabiletin nyǵaıtýdy is júzinde sheshý múmkin bola bermeıtini belgili bolyp otyr. Sońǵy jyldary túrli soǵystar men áskerı qaqtyǵystar oryn aldy. Tez ózgeretin jaǵdaı dáleldenbegen qaǵıdalardan alshaqtap, olardyń negizinde qarýly teketirestiń nysandary men ádisterine jan-jaqty taldaý júrgizýdi, týyndaıtyn qaýip-qaterler men syn-tegeýrinderge den qoıýdyń jańa tásilderi men ádisterin ázirleýdi talap etedi, – dedi Qorǵanys mınıstri.
Ol memlekettiń qaýipsizdigin qamtamasyz etý máselelerin sheshýde klasıkalyq áskerı ǵylymda qalyptasqan tásilderdi qaıta oılastyrý qajettiligi týyndaǵanyn atap ótti.
– Osy úrdisterdi eskere otyryp, áskerı bilim berý reformasy júrgizilýi, profesorlyq-oqytýshylar quramynyń kásibı deńgeıi men quzyrettiligi, sondaı-aq áskerı pedagogtardyń mártebesi arttyrylýy tıis. Áskerı kadrlardy daıarlaý júıesiniń ózi ıkemdi jáne tıimdi bolýy, memlekettiń qazirgi áskerı uıymynyń qajettilikteri men mindetterine jaýap berýi kerek. Ol áskerı qurylystyń perspektıvalyq mindetterimen, oǵan qosa jańa býyn soǵystarynyń sıpatyn boljaýmen baılanysty bolýy qajet, – dedi vedomstvo basshysy.
Ǵylymı jáne ǵylymı-pedagogıkalyq kadrlardy daıarlaý, beıindi áskerlermen ózara is-áreketke josparlanǵan oqý baǵdarlamalarynyń mazmundyq bóligin jańǵyrtý, kásibı jáne akademıalyq utqyrlyq nysandaryn engizý, keıbir basshylyq qujattardy qaıta qaraý syndy basymdyqtarǵa toqtaldy general-polkovnık Rýslan Jaqsylyqov áskerı pedagogtar aldynda sóılegen sózinde.
Qorǵanys mınıstri qazirgi zamanǵy áskerı ǵylymsyz jáne áskerı bilim berýdiń naqty qurylǵan júıesinsiz, boljam josparsyz jáne ǵylymı negizdelgen sheshimder qabyldamaı, memleketimizdiń áskerı qaýipsizdigin qamtamasyz etýdiń qazirgi zamanǵy talaptarǵa jaýap beretin júıesin qura almaıtynymyzdy atap ótti.
Budan ózge ol quqyqtyq tártip pen áskerı tártipti qamtamasyz etýge, qaýipsizdik sharalaryn qatań saqtaýǵa, jeke quramnyń ómiri men densaýlyǵyn saqtaýǵa erekshe nazar aýdardy.
Sońynda Qorǵanys mınıstri joǵary oqý oryndarynyń jeke quramyna memlekettiń áskerı qaýipsizdigin nyǵaıtý múddesinde joǵary bilikti kadrlardy daıarlaýda tabys tiledi.