Oıtamshy
Sheberhanaǵa taıaǵyna súıenip qalt-qult etken qarıa kirdi.
– Iá, aıta berińiz, ata!
– Balam, myna uıaly telefonymdy jóndep bere ǵoıshy, talaıdan beri únsiz, shyryldamaıdy.
Atanyń telefonyn ustaǵannan-aq onyń buzylmaǵanyn bilgen sheber:
– Ata, istep tur eken ǵoı, esh jerinde aqaý joq, – dep keri qaıtarǵanda, álgi qarıa:
– Endeshe, balam nege habarlaspaı jatyr eken, kóp boldy, telefon soqpady.., – dep kemseńdeı jylap jibergen eken.
WhatsApp jaǵalap júrgen bul áńgime bálkim sizdiń de kózińizge túsken bolar, astarly, oıly dúnıe, á?
Jumysyńyz qansha jerden qaýyrt bolsa da, jaqyndaryńyzǵa qońyraý shalýǵa bar-joǵy eki mınýt jetip jatyr. Kúıki tirlik eshqashan bitpeıdi. Tipti, Facebook, Instagram, TikTok betinde de saǵattap otyrýǵa barmyz. Sonyń arasynan eki-úsh mınýt ýaqyt tabýǵa bolady. Nıet kerek ol úshin.
Men, máselen, qazir ǵana osy jazbany WhatsApp-tan oqı salyp, birazdan beri sóılespeı ketken tanysyma telefon shalyp, jaǵdaıyn bildim, anasynyń, aýyryńqyrap júrgen kúıeýiniń densaýlyǵyn suradym. Qýanyp qaldy. Óziń de úlken is tyndyrǵandaı jeńildep, jadyrap qalasyń. «Kóńil kóńilden sý ishedi» degen ras sóz negizi.
Esterińizde me, tanymal telejýrnalıst Beısen Quranbek kóz jumarynyń aldynda Feısbýk paraqshasyna bir jazba jarıalaǵan bolatyn. «Nege ekenin bilmeı̆min, keshirim suraǵym keldi. Qarbalaspen júrip talaı̆ jaqyn adamymnyń, dostardyń, týystardyń tanystardyń kóńilin qaldyrdym. Qýanyshyna bara almadym, qaı̆ǵyda qasynda bola almadym. Qazir oı̆lap otyrsam, sonyń bárinde ózimdi «jumystan qol bosamaı̆ jatyr ǵoı̆» dep aqtap alyppyn. Kóńil deı̆tin óte názik, adam degen óte qymbat, ómir degen óte qysqa dúnıe ekenin umyta jazdappyn... Keshirińizder!», – degen mátinde.
Beısen áriptesimiz úziletinin sezgen bolar, elmen baquldasqany bolar. Al «erteń, erteńmen» júrip qarıamyzǵa habarlasa almaı, ol kisi úzilip ketse, ókinishtiń eń úlkeni sol bolmaq.
Osy jerde taqyrypqa qatysy bar basqa bir máseleniń sheti shyǵyp turǵany. Qazir «telefon alaıaqtary», ıaǵnı onlaın otyryp ta qaltańyzdy úptep ketetinder qaptady. Olar kóbine beımezgil ýaqytta qońyraý soǵady. Tutqany álgindeı telmirip balasynan bir habar kútip júrgen qarıa kóterse, bitti deı berińiz.
Tún jarymynda telefonnyń arǵy jaǵynan bireý «Áke, men ǵoı, ulyńyz! Jol apatyna túsip qaldym. Qabyrǵam syndy. Tez aqsha kerek bolyp jatyr», – dep bozdap qoıa bergende, uıqyly-oıaý qart kisi qapelimde ne isterin bilmeı, onsyz da júreginde alań bar, tutqanyń arǵy jaǵynda turǵan adamnyń aıtqanyn istep, qaltasyndaǵy baryn salyp jiberedi.
Eń qyzyǵy sol, qazir jasandy ıntellektiniń kómegimen jaqyndaryńyzdyń daýsymen qońyraý shalatyndar da kóbeıgen kórinedi. Sondyqtan ásirese, ata-anamyzdyń, qarttardyń hal-jaǵdaıyn jıi bilip turaıyq. Jáne de tanys emes nómirden alaıaqtar túrli oqıǵalardy oıdan qurastyryp habarlasatynyn, ondaı kezde meılinshe salqynqandy bolý kerektigin aıtyp qoıǵan jón. Al eger bóten bireý qońyraý soqsa, aldymen ulǵa, qyzyna nemese nemeresine habarlasyp, mán-jaıdy bilip alǵany abzal.
Áńgimemizdiń basyndaǵy taqyrypqa qaıta oralsaq, siz búgin telefonmen qansha adammen sóılestińiz?