Qazaqstanda jyljymaıtyn múlik naryǵynda jańa bastamalar qyzý talqylanýda. Ulttyq ekonomıka mınıstrliginiń usynysymen qolǵa alynǵan qolma-qol esep aıyrysýǵa tyıym salý jáne QQS jeńildigin alyp tastaý sharalary qurylys salasy men turǵyndar arasynda alańdaýshylyq týdyryp otyr. Bul ózgerister naryqqa teris áser etýi múmkin, sebebi olar páter baǵalarynyń ósýine, mámilelerdiń azaıýyna jáne jalpy ekonomıkalyq jaǵdaıdyń qıyndalýyna alyp kelýi yqtımal, dep habarlaıdy aqshamnews.kz
Qazirgi tańda Qazaqstanda jyl saıyn 45-60 myńdaı jyljymaıtyn múlik mámilesi jasalady. Alaıda, QQS mólsherlemesiniń kóterilýi jáne qolma-qol esep aıyrysýǵa tyıym salý, satyp alý-satý mámileleriniń kólemin aıtarlyqtaı azaıtýy múmkin. Bul sharalardyń nátıjesinde jyljymaıtyn múlik naryǵynyń turaqsyzdanýy, qurylys kompanıalarynyń qarjylyq aýyrtpalyqtarynyń artýy jáne tutynýshylardyń baspanaǵa qoljetimdiliginiń tómendeýi baıqalýy múmkin.
Sarapshylardyń aıtýynsha, qolma-qol esep aıyrysýǵa tyıym salý tek «kóleńkeli ekonomıka» aınalymynyń artýyna, mámilelerdiń ashyqtyǵynyń tómendeýine alyp kelýi múmkin. Qurylys kompanıalary men satyp alýshylar kelisimsharttarda naqty soma tómen kórsetilip, aıyrmashylyqty qolma-qol tólemder arqyly jasaı alady. Bul jaǵdaı memlekettik salyq túsimderiniń azaıýyna jáne sybaılas jemqorlyqtyń kúsheıýine ákelýi yqtımal.
Sonymen qatar, QQS jeńildigin alyp tastaý qurylys salasyndaǵy shyǵyndardy kóbeıtedi, bul óz kezeginde páter baǵasynyń ósýine sebep bolady. Eger qurylys kompanıalary salyqty óz esebinen tólemese, barlyq shyǵyndar tutynýshyǵa júkteledi. Bul ásirese halyqtyń áleýmettik osal toptary úshin qıyn jaǵdaı týǵyzýy múmkin.
Sarapshylar bul sharalardyń tıimdiligine kúmán keltirip, naryqty shekteýlermen emes, ádil salyq saıasaty arqyly retteý qajet ekenin alǵa tartady. Tutynýshylar men qurylysshylardyń kóleńkeli naryqqa ketpes úshin ekonomıkanyń ashyq ári ádil jumys isteıtin jaǵdaıyn jasaý mańyzdy.