Qol terisi bet pen dene terisine qaraǵanda juqa. Sondyqtan onyń kútimine de erekshe mán bergen jón.
Kúndelikti qarapaıym áreketter densaýlyǵyńyzǵa jáne qol terisiniń sulýlyǵyna zıan keltirip jatqanyn baıqamaýyńyz múmkin. Qol terisiniń erte qartaıýyna yqpal etetin kópshilik jiberetin qatelikterdi usynamyz, dep habarlaıdy Almaty-akshamy.kz Elorda.kz saıtyna silteme jasap.
Bet pen dene terisine qaraǵanda qol terisi óte juqa. Sondyqtan ol jas ereksheligi ózgeristerine belsendi ushyraıdy. Oǵan qosa, kópshilik adam qolǵa betke sekildi arnaıy kútim jasaı bermeıdi.
1-qatelik: Qoldy sýǵa jıi salý jáne turmystyq hımıa qoldaný kezinde qolǵap kımeý
Kópshilik áıel jiberetin keń taraǵan qateliktiń biri — úıdi tazalaý kezinde arnaıy qolǵap kımeý. Tazartýshy quraldar men untaqtar, ydys jýatyn quraldar jáne únemi qoldy sýǵa salý — munyń barlyǵy terini qurǵatady, al ol onyń qartaıýyna yqpal etedi.
2-qatelik: Terini ýaqytyly ylǵaldandyrmaý
Teri, ásirese, sýyq merzimde ylǵal joǵaltatynyn bilemiz. Bul jaǵdaıdy keńse men úı ishindegi aýanyń qurǵaq bolýy, turmystyq hımıa qoldaný jáne tońyp qalý odan ári ýshyqtyryp jiberedi. Bul problemany sheshý úshin qoldy krem kómegimen ylǵaldandyrý jetkilikti. Ár ydys jýǵannan keıin, úı jınaǵannan soń, dalaǵa shyǵarda jáne uıyqtar aldynda qolǵa krem jaǵýdy ádetke aınaldyryńyz. Qolǵa arnalǵan kremderde ár jerge qoıyp qoıyńyz jáne mindetti túrde sómkeńizde bireýi bolǵany durys. Sol kezde bul paıdaly ádetti umytyp ketpeısiz.
3-qatelik: Antıbakterıalyq quraldy qosymsha kútimsiz jıi qoldaný
Antıbakterıalyq sabyn, maılyq nemese spreıdi kúndelikti qoldaný — ómirimizge engen ádettiń biri. Ol bakterıalar men vırýstardyń juǵý qaýpin azaıtqanymen, qol terisiniń jaǵdaıyna teris áser etedi. Antıbakterıalyq quraldar terini qatty qurǵatady, sondyqtan olardy jıi qoldansańyz, terini ylǵaldandyryp turýdy umytpańyz. Sondaı-aq arasynda qoldy tuzdy sýǵa salyp, maskalar jasańyz.
4-qatelik: Dalaǵa qolǵapsyz shyǵý
Qysta qol qosymsha kúızeliske ushyraıdy: kópshilik adamnyń qoly tońǵan kezde terisi qurǵaıdy, qyzarady jáne titirkenedi. Mundaı problema oryn almas úshin dalaǵa jyly qolǵapsyz shyqpaǵan jón.
5-qatelik: SPF-qural qoldanbaý
Qaı merzimde bolmasyn jıi kezdesetin qatelik — terini kúnnen qorǵamaý. Qol betke qaraǵanda kún belsendiligine jıi tap bolady. Sebebi ol tike kún sáýlesiniń astynda turady. Últrakúlgin terimizdegi gıalýron qyshqylyn buzady, al ol onyń qurǵaýyna jáne ájimderdiń paıda bolýyna yqpal etedi. Sondyqtan da uzaq serýendeý kezinde nemese demalysqa shyqqanda qol terisin SPF-qural jaǵý arqyly qorǵaýdy umytpańyz.