Astana polısıasy balalar arbasyn qoldy qylǵan azamatty anyqtady
Polısıaǵa qala turǵyny habarlasyp, belgisiz bireý onyń 200 myń teńge turatyn balalar arbasyn urlap ketkeni jóninde aryzdanǵan.
Jábirlenýshiniń aıtýynsha, ol arbany shamaly ýaqytqa qaldyryp, qaıta oralǵanda ornynda joq ekenin kórgen. Astana qalasy PD izdeý bóliminiń qyzmetkerleri jedel-izdestirý is-sharalaryn júrgizý barysynda urlyq jasady degen kúdikpen 41 jastaǵy qala turǵynyn ustady.
Tergeý barysynda er adamnyń Qabanbaı batyr dańǵylymen kele jatyp, jol boıynda qaraýsyz turǵan balalar arbasyn baıqaǵany belgili boldy. Qylmystyq oımen kúdikti áreketterin baqylap turǵan kýágerlerdiń joqtyǵyna kóz jetkizgen soń, arbany kóligine tıep alyp ketken.
Atalǵan fakti boıynsha sotqa deıingi tergeý amaldary júrgizilip jatyr. Er adamnyń elorda aýmaǵynda jasalǵan osyǵan uqsas basqa da qylmysqa qatysy bar-joǵy tekserilip jatyr. Astana qalasynyń polısıa departamenti azamattarǵa qyraǵy bolýǵa, baǵaly zattardy qaraýsyz qaldyrmaýǵa keńes beredi.