Qatar astanasy Dohada ótip jatqan sý sporty túrlerinen álem chempıonatynda Qazaqstan sportshylary tarıhta alǵash ret altynnan alqa taqty.
Edýard Kım men Nargıza Bolatova juby tehnıkalyq baǵdarlamada chempıon atandy. Ulttyq quramanyń qos sportshysy fınalda 228,0050 upaı jınady. Tóreshiler baǵdarlama qıyndyǵy jaǵynan olardyń ónerin joǵary baǵalady (31.5000 bal).
Bul Qazaqstan atletteriniń sý sporty túrlerinen álem chempıonatynda qol jetkizgen alǵashqy altyn medali. Birinshi júldeni byltyr Japonıada ótken álem chempıonatynda tehnıkalyq baǵdarlamada Edýard Kım (qola medal) jeńip alǵan.
Kúmis medal Qytaı quramasyna (Ventao Chen men Haoıýı Shı), qola júlde Meksıka komandasyna (Mıranda Hımenes pen Dıego Karrılo) buıyrdy.
Edýard pen Nargıza aldaǵy kúnderi Qazaqstan qorjynyn taǵy bir júldemen tolyqtyra alady. Ol úshin erkin baǵdarlamada osy qarqynynan taımaýy kerek.
Qazir Qazaqstan jalpy esepte 1 altynmen 5-orynǵa kóterildi. Kósh basynda Qytaı tur. Qazir Qatarda 17 memleket júldege ıe boldy.
Álem chempıonatyndaǵy buǵan deıingi eń úzdik kórsetkishterimiz:
2023 jyl. Ártistik júzý. Tehnıkalyq baǵdarlama. Edýard Kım
2015 jyl. 100 metrge bras ádisimen júzý. 4-oryn (77 qatysýshy). Dmıtrıı Balandın
200 metrge bras ádisimen júzý. 6-oryn (52 qatysýshy). Dmıtrıı Balandın
2019 jyl. 100 metrge bras ádisimen júzý. 7-oryn (87 qatysýshy). Dmıtrıı Balandın
2019 jyl. 200 metrge bras ádisimen júzý. 7-oryn (52 qatysýshy). Dmıtrıı Balandın
2017 jyl. 25 shaqyrymǵa júzý. 7-oryn (25 qatysýshy). Vıtalıı Hýdákov.