Saıysqa kúshtik qurylymdardyń 450 sportshydan turatyn 26 komandasy qatysty
Aqmola oblysynyń Shýchınsk qalasynda erler men áıelder arasynda qoıan-qoltyq, armıalyq qoıan-qoltyq, tolyq janaspaly qoıan-qoltyq urystary jáne ózin-ózi qorǵaý boıynsha Qazaqstan chempıonaty ótti, dep habarlaıdy Almaty-akshamy.kz.
Jarysqa qalalardyń, oblystardyń jáne kúshtik qurylymdardyń 450 sportshydan turatyn 26 komandasy qatysty.
– Chempıonat armıa sportshylarynyń daıyndyq deńgeıiniń joǵary ekenin kórsetti. Qatysýshylardyń kóptiginen fınalǵa jetý ońaı bolǵan joq. Bizdiń endigi mindet – álem chempıonattarynda sátti óner kórsetý, – dep atap ótti Ortalyq sport klýbynyń sambo jáne qoıan-qoltyq jekpe-jekten jattyqtyrýshysy Asan Mámbetqulov.
«Qoıan-qoltyq» urysynan 73 kelige deıingi salmaqta Qorǵanys mınıstrligi Ortalyq sport klýby – Sport komıtetiniń halyqaralyq dárejedegi sport sheberi merzimdi qyzmettiń qatardaǵy jaýyngeri Áset Anarbaev altyn medaldi jeńip aldy. Qorǵanys vedomstvosyna taǵy bir «altyndy» 57 kelige deıingi salmaq dárejesinde óner kórsetken Qarýly Kúshterdiń áskerı qyzmetshisi, maıor Aman Shákirtov ákeldi.
Áıelder arasynda Qarýly Kúshterdiń qyzmetkerleri Ortalyq sport klýbynyń sportshylary 53 jáne 64 kelige deıingi salmaq dárejesinde Aıan Tursyn men Sora Rahmonova chempıon atandy.
Jalpy esepte Qorǵanys mınıstrliginiń komandasy tórt altyn, eki kúmis jáne úsh qola medal jeńip alyp, jalpy komandalyq birinshi orynǵa ıe boldy.