Qurban aıt merekesine eki kún qaldy.
Musylmandar úshin jylyna bir keletin ulyq merekede qurbandyqqa negizinen qoı maly shalynady. Sol sebepti naryqtaǵy qoı baǵasy qansha ekenin baǵamdap kórýge tyrystyq.
Olx.kz-tegi habarlandyrýlarǵa kóz júgirtsek, búgingi kúni Almaty qalasy boıynsha qoıdyń eń arzan degeni 35000-nan bastalady eken. Baǵalar maldyń kúıine qaraı ár túrli. Jarnama platformasynda biz baıqaǵan eń joǵary baǵa - 80000 teńge kóleminde. Bul jerde qoıdy alǵan jerden qala ishine jetkizip berý qyzmeti de kiredi eken.
Al elimizdiń bas qalasy - Astanada dál osy platformasynda qoı baǵasynyń eń tómeni 35000-nan bastalyp, eń joǵary baǵa 200 myńǵa deıin jalǵasa beredi eken. Mundaǵy negizgi ortasha baǵa 55000 men 65000 teńge kóleminde.
Osy rette, qurbandyqqa shalynatyn maldyń qandaı bolýy shart degen aqparatty nazarlaryńyzǵa usynamyz:
QMDB Sharıǵat jáne pátýa bóliminiń shyǵarǵan pátýasyna saı, qurbandyqqa tańdap alynǵan maldyń saý, minsiz bolýy talap etiledi.
Birinshiden, bul pendeniń Jaratýshy Iesine degen joǵary deńgeıdegi ádeptilik qarym-qatynasyn kórsetedi. Qurbandyqtyń eti de, qany da Alla Taǵalaǵa qajet emestigi, Oǵan tek pendeniń taqýalyǵy ǵana jetip baratyny belgili. Osy oraıda pende qurbandyq úshin saý, aıypsyz maldy izdep tabý arqyly taqýalyqqa áreket etedi.
Ekinshiden, osy arqyly kedeılerdiń jabyrqańqy kóńilderi kóteriledi. Olarǵa jaramsyz, kemshiligi bar maldyń etin emes, eń ádemi maldyń etin syıǵa tartý jaqsy is sanalady. Olar ózderin qurmetti adam retinde sezine bastaıdy.
- Qurbandyqqa qoı, eshki, iri qara nemese túıe shalý. Maldyń erkegi de, urǵashysy da jaraıdy. Eti kóp, dámi jaqsy bolǵany abzal.
Qoı men eshki bir adamnyń atynan baýyzdalady. Bir adam eki qoı baýyzdasa, ekeýi de qurbandyq bolady jáne eki qurbandyqtyń saýabyn alady. Al, túıe men iri qarany bir adamnan jeti adamǵa deıin shalýǵa bolady. Buǵan Jabırdiń (odan Alla razy bolsyn) «Alla elshisimen birge Hýdaıbıada bir túıeni jeti adamnyń atynan jáne bir qaramaldy jeti adamnyń atynan baýyzdadyq»[1] dep aıtqan sózi dálel. Munda jeti adamnyń da nıeti qurbandyq shalý nemese etin sadaqa etý bolý kerek.
- Aqaýy joq, minsiz maldy qurbandyqqa shalý. Kózi kórmeıtin, bir kózi joq, aqsaq, tym aryq, tisteri joq, qulaǵy kesilgen, jelini kepken, quıryǵy nemese qulaǵynyń úshten bir bóliginen kóbi kesilgen maldy qurbandyqqa shalý durys emes. Paıǵambarymyz (oǵan Allanyń salaýaty men sálemi bolsyn):
«Tórt mal qurbandyqqa jaramaıdy: qylılyǵy aıqyn, aýrýy anyq, aqsaqtyǵy málim, jilik maıy taýsylǵan (tym aryq) maldar», – degen
Múıizi joq nemese múıizi synǵan, qulaǵy jarylǵan nemese qulaǵy tesilgen maldy qurbandyqqa shalýǵa bolady. Sonymen qatar, pishtirilgen maldy da qurbandyqqa shala beredi. Ondaı maldyń eti mol ári dámi tátti bolady jáne ol aıyp bolyp eseptelmeıdi[3].
Satyp alǵan qurbandyq maly aıypty bolyp qalsa, ony saý malǵa aýystyrady. Maldy baýyzdaıtyn kezde ne baýyzdaý sebebimen kózin shuqyp alsa nemese soıýǵa apara jatyp aıaǵyn syndyryp alsa, onyń oqasy joq.
- Belgili jasqa jetken maldy qurbandyqqa shalý. Qoı men eshki bir jasqa jetý kerek. Al, iri qara eki jasqa, túıe bes jasqa tolýy shart[4]. Bir jasqa tolmaǵan semiz ári iri qoıdy da qurbandyqqa shalýǵa ruqsat etiledi. Degenmen, saqtyq retinde bir jasqa tolǵan qoıdy shalǵan abzal.