B.Brehtiń «Esirgen shesheı jáne onyń balalary» atty pesasynyń jelisi boıynsha qoıylǵan «Peri qatyn» spektakli kópshiliktiń kóńilinen shyǵyp, kórermenniń kózaıymyna aınaldy desek te bolady.
Muhtar Áýezov atyndaǵy qazaq ulttyq akademıalyq drama teatry «Peri qatyn» spektakliniń premerasymen 95-shi teatr maýsymyn japty, dep habarlaıdy Almaty-akshamy.kz
Qoıylym bastalǵannan-aq kórermenderdiń nazaryn ózine aýdaryp, sońyna deıin ustap tura aldy. Spektáklde ana men balanyń mahabbaty, soǵys saldarynyń adam taǵdyryna qanshalyqty úreı ákelgeni, qoǵamdaǵy túıtkildi máseleler, qyz balasyna degen qatygezdik sheber sýrettelgen.
Ásirese, áıelder men soǵys taqyryby, adamgershilik qasıetter jan-jaqty qozǵalyp, árbir detalǵa erekshe mán berilgen. Ári onda kózge kórinbeıtin, myltyqsyz maıdan qursaýyna alǵan sıtýasıa adamdardy kúreske ıtermeleıdi. Biraq bul soǵysta jeńýshi jáne jeńilýshi tarap bola ma? Álde tirshilik ataýly túbi joq qulqyn qurdymyna jutylyp tyna ma? Qoıylym osyndaı fılosofıalyq suraqtarǵa jaýap izdeıdi.
Shesheıdiń úsh balasy da soǵystyń, dálirek aıtsaq, soǵys jyldaryndaǵy qatygez zalymdardyń qurbanyna aınalady. Dese de, perzentinen aıyrylyp, júregi qan jylap jatsa da, syna qoımaǵan Peri qatynnyń myqtylyǵyna qaıran qalasyń. «Qalaı bolsa da isimdi jalǵastyrýym kerek» dep, saýdamen kúneltip júrgen áıeldiń bolmysyn balalarynyń ólimi de ózgerte almady.
Shyn máninde, qoıylym - búgingi qoǵamdaǵy shyndyqpen betpe-bet kelgen biregeı týyndy. Oqıǵa dáýirmen shektelmegen shartty bir álemde ótedi. Nemis dramatýrginiń týyndysyn qazaq aýdıtorıasyna saı etip beıimdegen. Ony keıipkerlerdiń qazaqshalanǵan esimderinen baıqaýǵa bolady.
Spektákldiń jaryqqa shyǵýyna atsalysqan shyǵarmashylyq toptyń jumystary olardyń naǵyz sheber, óz isiniń kásibı mamandary ekendigin dáleldedi. Basty rólderdi tanymal ártister – Danagúl Temirsultanova, Indıra Meńdibaeva, Qaırat Nábıolla, Almas Shaıahmetov, Baýyrjan Qaptaǵaev joǵary deńgeıde somdap shyqty.
Elik NURSULTAN,
«Peri qatyn» dramasynyń qoıýshy-rejısseri:
– Bul úlken klasıkalyq shyǵarma bolǵandyqtan, kórermenge aýyr bolýy múmkin. Bizdiń teatr B.Brehtke bara bildi. Jaqynda Qazaqstandaǵy jalǵyz brehttanýshy Bolat Atabaev qoıylymdy tamashalap, oń baǵasyn bergen bolatyn. Bul shyǵarmanyń búgingi kúnmen úndestigi bar. Sonysymen erekshe. Biraq bul jerde belgili bir memleket týraly aıtylmaıdy. Aksent jalpy adamzatqa qoıylady. Shyǵarmada bir otbasynyń taǵdyr taýqymeti men júrip ótken joly arqyly adamzattyń satqyndyǵy men adamdyǵy, birin-biri paıda úshin qoldanýy, jalpy tolyq adamnyń problemasy, adamı qundylyqtardyń qaqtyǵysy sıaqty dúnıeler qozǵalǵan. Qoıylymda bir keıipkerdiń sózinde «Ómirdiń ózi soǵys» degen oı aıtylady. Iaǵnı teatr ártisteri ár keıipkerdiń ómir jolyndaǵy kúresin kórsetý barysynda qoǵamdyq kórinisti aıqyn jetkizip bere aldy.
AQNIET,
kórermen, QyzPÝ-dyń 3-kýrs stýdenti:
– Bos ýaqytymda teatrǵa barǵandy janym súıedi. Oıym bólinip, ájepteýir tynyǵyp qalamyn. Kezekti jańa qoıylymdy birden túsiný ońaı bolmady. Qoıylym bastalǵannan oqıǵa jelisiniń tereńine súńgip, keıipkerlermen birge barlyq sezimdi bastan ótkerdim. Peri qatynmen birge kúıinip, mylqaý qyzynyń qınalǵanyn kórgende birge jylap, al dinbasynyń keıbir áreketterine ishek-silem qatyp kúlip te aldym. Óte aýyr shyǵarmany jarqyratyp el aldyna pash etken Elik Nursultanǵa jáne Peri qatynnyń rólin somdaǵan Darıa Júsiptiń ónerine tántimin. Qazirgi qoǵamda óte kókeıkesti bolǵanmen, qozǵaı almaı otyrǵan taqyryptar bar. Sol úshin bizge jaýyrdy jaba toqymaı, dál osyndaı qoǵamǵa qajet, qat dúnıelerdi sahnaǵa kóptep shyǵarý kerek sıaqty. Búgingi qoǵamdaǵy shyndyqpen betpe-bet kelgińiz kelse, «Peri qatyn» spektakline baryńyz der edim.