Almatyda ótken kezdesýlerge birqatar qoǵam belsendileri men sarapshylar qatysty, dep habarlaıdy
Kezdesýge qatysýshylar qatarynda QR Azamattyq alánsynyń prezıdenti Baný Nurǵazıeva, QR Prezıdenti arhıviniń janyndaǵy Qoǵamdyq keńestiń tóraǵasy Borıs Djaparov, Almaty qalalyq máslıhatynyń depýtattary Altynaı Kóbeeva men Bekbol Ramazan, M. Áýezov atyndaǵy ádebıet jáne óner ınstıtýtynyń dırektory Kenjehan Matyjanov, ıadrolyq fızıka salasyndaǵy qazaqstandyq ǵalym Medeý Ábishev jáne basqa da saıası partıa ókilderi boldy.
Alǵashqy kezdesý Almaty qalasynyń Qoǵamdyq keńesi múshelerimen ótti. Bul jıynda AES qurylysyn salý sekildi mańyzdy jobalarǵa qatysty sheshim qabyldaý prosesinde qoǵamdyq qatysýdyń mańyzy talqylandy. Qoǵamnyń belsendi qatysýy «Ádiletti Qazaqstan» qurýda sheshýshi ról atqaratyny erekshe atap ótildi.
Sondaı-aq, Iadrolyq fızıka ınstıtýtynyń qyzmetkerlerimen kezdesý uıymdastyryldy. Bul kezdesýde AES qaýipsizdigi máseleleri basty nazarda boldy. Instıtýt ókilderi halyqaralyq qaýipsizdik standarttary men yqtımal apattyq jaǵdaılardyń aldyn alý sharalary týraly baıandady.