Bul senbi kúni tańerteń Almatynyń ár túkpirinde qala turǵyndary belsendilik tanytyp, qys boıy jınalǵan qoqysty jınaýǵa kiristi. Olar kúrek, tyrma men sypyrǵyshtaryn alyp, japyraqtardy úıip, qaptarǵa salyp, júk kólikterine tıep, qalany tazartyp jatty.
Bul ıgi isten Almaty qalasynyń Qoǵamdyq keńesiniń ókilderi de shet qalmady. Túske deıin Jarokov pen Baıkadamov kósheleriniń qıylysynda ornalasqan Ońtústik saıabaqtaǵy kúzgi japyraqtar men qoqys túgeldeı jınalyp, shyǵarýǵa daıyn boldy.
Aksıaǵa qatysýshylar jumysty ynta-jigermen atqaryp, bul iske erekshe yqylaspen kiriskenderi baıqaldy. Qoǵamdyq keńes múshesi Aıgúl Shoqshyqbaeva senbilikke qatysty oıyn bylaısha jetkizdi:
– Biz «taza qala – taza ómir» degen qaǵıdany qoldaımyz. Ár adam óz aınalasynyń tazalyǵyn saqtasa, bul ózgelerge de, ásirese, jastarǵa jaqsy úlgi bolar edi. Tańerteń erte turyp, senbilikke qatyssaq ta, ózimizdi sergek sezindik. Almaty – shynaıy qamqorlyq pen mahabbatqa laıyq qala. Ony taza ustap, qorǵaý – bizdiń azamattyq mindetimiz!
Qala turǵyny Balym Bataeva bolsa, qoǵamdyq iske atsalysýdyń adam kóńil-kúıine oń áser etetinin atap ótti:
– Búgin aýa raıy keremet! Árıne, tańerteń tósekten áreń turdym (kúlip), biraq qazir atqarǵan eńbegime rıza bolyp turmyn. Osy az ǵana ýaqyttyń ishinde qanshama japyraq pen qoqys jınadyq! Qala kelbetiniń taza bolǵanyn kórgende óz úlesińniń bar ekenin seziný – erekshe qýanysh. Bul isimiz ózgelerge úlgi bolady dep oılaımyn. Barsha almatylyqtardy osyndaı ıgi sharalarǵa qatysyp, qalamyzdyń kórkeıýine úles qosýǵa shaqyramyn.
Qoǵamdyq keńes tóraıymy Altynaı Kóbeeva mundaı sharalardyń qoǵamdy biriktirýdegi mańyzy zor ekenin atap ótti:
– Búgin Qoǵamdyq keńes músheleri qalalyq senbilikke qatysyp, Almatynyń ekologıalyq mádenıetin qalyptastyrýǵa óz úlesterin qosty. Árbir turǵyn óz qalasynyń tazalyǵyna jaýapty ekenin sezinýi kerek. Osyndaı sharalarǵa qatysý – adamdy ózgelerdiń eńbegin qurmetteýge úıretedi, ortaq iske jumyldyrady. Qýanyshtysy, áriptesterim bul bastamany qoldap, óz isterin keıinge qaldyryp, qala tazalyǵyna úles qosýǵa asyqty. Bul – Almatyǵa degen shynaıy mahabbattyń kórinisi. Barsha turǵyndardy óz aýlasyn, kóshelerin taza ustaýǵa shaqyramyn. Eger árkim kishkentaı bolsa da óz úlesin qossa, qalamyz kórkeıe túsedi. Aldaǵy ýaqytta aǵash otyrǵyzý jumystary bastalady, bul iske de atsalysaıyq!
76 jastaǵy eńbek ardageri Tóleýtaı Japparov ta belsendilik tanytyp, ózgelerden qalyspaı eńbek etti. Jasyna qaramastan ol óz úlesin qosýǵa asyqty:
– Barlyǵy ózimizden bastalady. Úıimizdi, aýlamyzdy, kósheler men saıabaqtardy taza ustasaq, qoǵamdaǵy jalpy kóńil-kúı de jaqsarady. Búgin – Meıirimdilik kúni, bul árbir almatylyqty, qazaqstandyqty eń bolmaǵanda bir ıgi is jasaýǵa shaqyrady. Ár jaqsylyqtyń qaıtarymy bolady, al onyń eń úlken syıy – kóterińki kóńil-kúı! – dep túıindedi aqsaqal.
Aıta keteıik, «Almaty – ortaq úıimiz» aksıasy aıasynda senbilikter, tazalyq sharalary, aǵash otyrǵyzý jumystary jalǵasýda. Barsha qala turǵyndaryn osy bastamalarǵa belsendi qatysyp, Almatynyń taza ári kórikti bolýyna úles qosýǵa shaqyramyz!