"Almaty – bizdiń ortaq úıimiz" qalalyq naýqanyna búgin “Almaty áýenderi” óner birlestiginiń ánshisi Ǵarıfa Igisinova da kelip qosyldy.
– Almaty – jyldyń tórt mezgilinde de ásemdigin joǵaltpaıtyn kórkem qala. Endi az kúnde jer-álem jasyl jelek jamylady. Soǵan deıin aınalany tazartý, jerdi de jańa tirshilikke daıyndaý – azamattyq paryzymyz dep bilemin. Óner adamy retinde meni ádemilik ataýlynyń bári shabyttandyrady. Bizdi qorshaǵan ortanyń taza bolýy – ózimizdiń jaıly ómirimizdiń kepili, – dedi ekonaýqan qatysýshysy Ǵarıfa Igisinova.
“Almaty áýenderiniń” ánshisi Túrksib aýdanynda ornalasqan "Radar" ekobeketiniń kezekshi ekolog-operatory Maǵjan Ydyrysov jáne Almaty qalasy PD Jergilikti polısıa qyzmetiniń ınspektory Danıar Nursadyqpen birge jumys istep, gaz quramyn anyqtaıtyn qurylǵylardyń kómegimen qalaǵa kirgen kólikterden shyǵatyn zıandy zattardyń mólsherin tekserýge atsalysty.
– Biz qazir kúrejolda turmyz. Bul ekobekettiń qala aýasynyń taza bolýyna qosyp jatqan úlesi úlken. Mine, baıqap turǵandaryńyzdaı, aldynan san myń kólik ótip jatyr. Olardan aýaǵa bólinetin túrli zıandy zattardy aıtpasaq ta belgili. Sondyqtan temir tulpar tizgindegen jurtshylyq kóliginiń tehnıkalyq ahýalyna muqıat bolǵany durys dep oılaımyn. Almaty jalǵyz, al biz kóppiz. Qorshaǵan ortanyń, ózimiz jutatyn aýanyń taza bolýy – óz qolymyzda! – deıdi ánshi.
Osy oraıda megapolıske kireberistegi kúrejoldarda búginde 19 ekopost jumys istep turǵanyn tilge tıek etsek artyq bolmas. Bári de arnaıy gaz taldaǵysh jáne tútin ólshegish quraldarmen jabdyqtalǵan. Operatorlardyń esh kedergisiz qolaıly jumys isteýine múmkindikter jasalǵan.
- Ekobeketterdiń mindeti – ekologıalyq talaptarǵa saı kelmeıtin avtokólikterdi anyqtaý, kólik júrgizýshilerine túsindirý jumystaryn júrgizý, jolda júrý qozǵalysyn retteý, sol arqyly alyp shahar aýasynyń lastanýyna jol bermeý. Bir kúnde tehnıkalyq talaptarǵa saı kelmeıtin jeti-segiz kólik anyqtalady. Burynǵydaı emes, júrgizýshiler de jaýapkershilikti sezinedi. Saıyp kelgende, bul ózimiz, otbasymyz jutatyn aýa ǵoı, sondyqtan bárimiz tabıǵatqa, aınalaǵa janashyr bola bilsek nur ústine nur bolady, - deıdi ekolog-maman Maǵjan Ydyrysov.
Eske sala keteıik, qazir "Taza Qazaqstan" respýblıkalyq ekobaǵdarlamasy aıasynda Almaty saıabaqtarynda, skverlerde, ózen jaǵalaýlarynda jáne ekobeketterde aýqymdy ekologıalyq aksıalar uıymdastyrylýda. Onda qala turǵyndary men óner, mádenıet, sport juldyzdary nıet, tilek biriktirip, qoqystardy jınap, aryqtardy tazartyp, aǵash otyrǵyzýda.