Áleýmettik qyzmetter úıinde Almaty qalasy Qoǵamdyq keńesi tóralqasynyń keńeıtilgen otyrysy ótti.
Otyrys barysynda Almaty qalasy Qoǵamdyq keńesiniń tóraıymy Altynaı Kóbeeva AES salýy máselesine baılanysty referendým ótkizýdiń qajettiligin surap, osy taqyrypty ortaǵa saldy. Alǵashqy bolyp oıyn bildirgenderdiń biri – Almaty qalasy Qoǵamdyq keńesiniń múshesi, Almaty Azamattyq Alánsynyń tóraǵasy Qaıyrjan Ábdihalyqov boldy.
- Memleket basshysy óziniń Qazaqstan halqyna Joldaýynda 6 qazan kúni bolatyn referendým týraly jarıa etti. Árıne, bul óte mańyzdy shara. Óıtkeni referendým arqyly biz halyq únine qulaq asyp, azamattardyń AES salý máselesin qanshalyqty qoldaıtynyn kóremiz. Basqa memleketterde jeke tulǵa ne úkimet qana osyndaı sheshimderdi qabyldaıdy. Al bizdiń elde jyl boıy 20 óńirde jarıa talqylaýlar ótti. Iaǵnı, bizde úkimet óz betinshe ǵana emes, halyqpen birge osy sheshim qabyldaıdy, – dedi ol.
Referendým ótkizýge baılanysty Almaty qalasy Qoǵamdyq keńesiniń múshesi, ekonomıs Ákimjan Arýpov ta pikir bildirdi.
- Prezıdent jáne úkimet Qazaqstan halqynyń pikirin bilý úshin sońǵy 3 jylda 2 ret referendým ótkizilgeli jatyr. Prezıdent óz sózinde Ádiletti Qazaqstan qurýdyń basynda ekenimizdi atap ótti. Keı adamdar «Ádiletti Qazaqstan» qaıda deıdi? Osyndaı saıası qadamdar ádiletti qoǵamnyń irgetasyn qalap jatyr. Men ekonomıs retinde Qazaqstan ekonomıkasynyń órkendegenin qoldaımyn. Álemde 400 astam AES bar jáne atom reaktory bizdiń elimiz úshin de jańalyq emes. 1970 jyldardan bastap Aqtaý qalasynda atom reaktory qoldanyldy, – dedi Ákimjan Arýpov.