Qazaqstan Jazýshylar odaǵynyń 90 jyldyq mereıtoıy saltanatty túrde atalyp ótilýde, dep habarlaıdy aqshamnews.kz
Almatyda Qazaqstan Jazýshylar odaǵynyń 90 jyldyq mereıtoıy joǵary deńgeıde atalyp ótti. Bul shara qazaq ádebıetiniń tarıhı mańyzdylyǵyn kórsetip, rýhanı muramyzdy ulyqtaǵan aıtýly oqıǵa boldy. Jazýshylar odaǵy – qazaq ádebıetiniń qara shańyraǵy, ult rýhanıatynyń altyn qazyǵy.
Qazaqstan Respýblıkasynyń Prezıdenti Qasym-Jomart Toqaev mereıtoıǵa oraı joldaǵan quttyqtaý hatynda ulttyq ádebıettiń qoǵam ómirindegi mańyzdylyǵyn erekshe atap ótti. Memleket basshysy ádebıetti «oıymyzdyń tereńdigi men rýhymyzdyń asqaqtyǵyn aıǵaqtaıtyn uly qazyna» dep sıpattap, ony zaman talabyna saı damytýdy memleket aldynda turǵan mańyzdy mindetterdiń biri dep kórsetti.
Jıyn barysynda Qyrǵyz Respýblıkasy Prezıdentiniń keńesshisi Arslan Qoıshıev Sadyr Japarovtyń quttyqtaýyn jetkizse, alys-jaqyn shetelderden kelgen mádenıet jáne ádebıet qaıratkerleri qazaq ádebıetiniń baǵa jetpes murasyna degen qurmetin bildirdi.
Qazaqstan Jazýshylar odaǵynyń qazirgi tóraǵasy Mereke Qulkenov saltanatty sharada qazaq ádebıetiniń búgingi jańarý úderisi men shyǵarmashylyqtaǵy tyń serpin týraly baıandama jasady. Ol ádebıet qoǵamdaǵy turaqtylyq pen rýhanı damýdyń basty qozǵaýshy kúshi ekenin atap ótti.
Ult rýhanıatyna ólsheýsiz úles qosqan Jazýshylar odaǵynyń bul mereıtoıy qazaq qalamgerleriniń birligin, ádebıetimizdiń álemdik deńgeıdegi ornyn aıqyndady. Ulttyq ádebıet bolashaq urpaqqa mıras bolyp, jańasha bıikterge jetý jolynda damýyn jalǵastyra bermek.