Búgin Qazaqstan musylmandary dinı basqarmasynyń Sharıǵat jáne pátýa bólimi 6 maýsym kúni kesh batqanda jańa aıdyń kórinýine baılanysty zýl-hıjja aıynyń bastalǵanyn habarlaǵan bolatyn. Sondaı-aq arapa kúniniń 15 maýsymǵa jáne Qurban aıttyń alǵashqy kúni 16 maýsymǵa sáıkes keletini aıtyldy.
QMDB osy oraıda nelikten Qurban aıttyń birinshi kúni 17 maýsymnan 16 maýsymǵa aýysqany jóninde málimdedi, dep habarlaıdy Almaty-akshamy.kz.
QMDB Sharıǵat jáne pátýa bólimi ár jyldyń tórtinshi toqsanynda keler jyldyń dinı merekeleri men kúnderi kórsetilgen keste ázirleıdi. Onda hıjrı aılardyń bastalýy halyqaralyq astronomıalyq zertteý ortalyqtarynyń málimetteri negizinde jasalady. Sonymen birge pátýa mamandary dinı merekelerdiń naqty kúnderi jańa aıdyń kórinýine baılanysty kórsetilgen ýaqyttan bir kún shegerilýi nemese alǵa jyljýy múmkin ekenin eskertip otyrady.
Islam dininde qasıetti kúnder, túnder jáne aılar qamarı jyl sanaýy negizinde anyqtalady. Mundaı jyl sanaq aı fazasynyń ózgerýine qaraı esepteledi. Jańa aıdyń (hıláldyń) kórinýimen jańa aı bastalady. Qamarı aı keıde 29 ne 30 kún bolady.
Zýl-hıjja aıyn anyqtaý úshin zýl-qaǵda aıynyń 29-nda aıdy baqylaıdy. Kún batqan kezde jańa aı kórinse, kelesi kúni zýl-hıjja aıy bastalǵan bolyp sanalady. Eger aýa bultty bolyp, aı kórinbese, zýl-qaǵda aıyn 30 kúnge tolyqtyrady.
Osyǵan oraı, maýsymnyń 6-shy keshi jańa aıdyń naqty kórinýine baılanysty 7 maýsym zýl-hıjja aıy bastaldy. Sol sebepti jyl basynda eskertkenimizdeı qurban aıt kúni bir kún beri jyljyp, 16 maýsymǵa saı keldi.