Almaty jurtshylyǵy Qostanaıdan járdemin aıamady
Almaty ákimdigi Qostanaı oblysynda zardap shekkenderge gýmanıtarlyq kómek jınaǵyn jarıalady. Buǵan qala turǵyndary men erikti azamattar óz úlesin qosyp jatyr.
Qostanaı oblysyndaǵy órtke baılanysty Almatyda órtten zardap shekkenderge gýmanıtarlyq kómek jınaý bastaldy. Almaty qalasy Jastar saıasaty basqarmasynyń front-ofısiniń eriktileri Memlekettik jastar saıasaty qorymen, Kásipkerlik jáne ınvestısıalar basqarmasymen, sondaı-aq Almaty qalasynyń aýdandyq ákimdikterimen birlesip, Qostanaı oblysyndaǵy órtten zardap shekkenderge gýmanıtarlyq kómek jınaǵyn uıymdastyrdy.
Gýmanıtarlyq kómek berildi
«Qarajat pen qajetti azyq-túlik, kıim-keshek pen qurylys materıaldaryn jınaýǵa kásipkerler, aýdandyq ákimdikter qosyldy. Búgin Qostanaı oblysyna gýmanıtarlyq kómekpen tórt júk kóligi attanady. Biz negizgi azyq-túlik – sý, qant, maı, jarma, pechene, keptirilgen jemister jáne t.b., sondaı-aq eresekter men balalarǵa arnalǵan kıim, mektep kerek-jaraqtary, aıaqkıimder jınadyq», – dep túsindirdi jastar saıasaty basqarmasynyń basshysy Qaıyrjan Meńdiǵalıev.
Gýmanıtarlyq kómek jınaý jáne eriktilerdi qabyldaý qalanyń barlyq segiz aýdanynda tańerteń erte júrgiziledi, jıynnyń bas shtaby Baıtursynov kóshesi, 22, 1-bólme mekenjaıy boıynsha DEPO EVOLUTIONS PARK bolyp belgilendi. Azyq-túlik, uzaq merzimdi saqtaý ónimderi, dári-dármekter, gıgıena quraldary, kıim jáne tósek-oryn jabdyqtary jınalady.
«Biz qalalyq volonterlik uıymdardy biriktirdik. Jastar saıasaty basqarmasynyń front-ofısiniń eriktileri, sondaı-aq stýdentter qataryndaǵy Memlekettik jastar saıasaty qorynyń eriktileri tańerteńnen bastap gýmanıtarlyq kómek qabyldaý pýnktterinde jumys isteýde. Megapolıs turǵyndary da shette qalǵan joq. Bizge kıimder, balalar taǵamdaryn ákelýde. Qazirgi ýaqytta eriktiler júk kólikterin Qostanaı oblysyna jóneltýde», – dedi Almaty qalasynyń memlekettik jastar saıasaty qorynyń dırektory Ázız Qajdenbek.
Almaty qalasy Jastar saıasaty basqarmasynyń basshylyǵy qala turǵyndaryn aksıaǵa qosylýǵa jáne Qostanaı oblysynda zardap shekken otbasylarǵa kómektesýge shaqyrdy. Kómek kórsetýge, volonter bolýǵa nemese azyq-túlikpen qamtamasyz etýge kómekteskisi keletinderdiń barlyǵyna uıymdastyrýshylar 8 707 438 77 33 telefony boıynsha – Almaty qalasynyń volonterler front-ofısiniń basshysy Nursultan Bolatulyna qońyraý shalýdy suraıdy.
Sonymen qatar, almatylyq eriktiler qalpyna keltirý jumystaryna qatysady, sondaı-aq Qostanaı oblysynda júk jınaý úshin arnaıy qoımalar uıymdastyrady jáne halyqqa kómek taratý jumystaryn júrgizetin bolady.
ALǴASHQY LEK
Almatydan Qostanaıǵa jınalǵan jylýdyń alǵashqy legi 4 qyrkúıekte attanǵan bolatyn. Osy jumystyń qalaı órbigendigi týraly da aıta ketsek deımiz. Almatyda «Jastar rýhy» kovorkıng-ortalyǵynda Qostanaıdaǵy tótenshe jaǵdaıǵa baılanysty gýmanıtarlyq kómek uıymdastyryldy.
Bul sharaǵa muryndyq bolýshy Amanat partıasynyń Almaty qalalyq fılıaly bolyp tabylady. Birneshe kúnnen beri Qostanaı oblysynyń Áýlıekól aýdanyndaǵy órtten orman-toǵaı ǵana órtenip qoımaı, adam shyǵyny da oryn aldy. Tilsiz jaý birshama aýmaqty sharpydy. Sonyń saldaryn joıýǵa Almaty jurtshylyǵy da óz járdemderin tıgizýde.
Atalǵan kómek ortalyǵyna beldi kásipkerler, qala turǵyndary, qarapaıym azamattar da óz úlesterin qosýda. Naqtyraq aıtqanda, qant, un, kúrish, sary maı, sabyn syndy turmystyq qajettilik týdyratyn zattar jınalý ústinde. Bul týraly «Jastar rýhy» JQ AQF tóraǵasy Ákejan Keńesov málim etti.
Sonymen qatar, atalǵan ortalyqtyń jumysyna qarapaıym shahar turǵyndary men jastar da óz úlesterin qosyp, atsalysýda.
«Biz otbasymyzben birge osy bir keleńsiz habardy estidik. Anyq-qanyǵyn áleýmettik jelilerden bildik. Osy jaǵdaıǵa júregimiz aýyrdy. Sol sebepti de az da bolsa, kómektesýdi oıladyq. Sondyqtan kıim-keshek, azyq-túlik syndy túrli nárselerdi ótkizdik», – dedi Ershat Sábıtov esimdi qala turǵyny.
IGİ NIET TOLASTAR EMES
Almatylyqtar bastaǵan kómekke qosylýshylar sany óte kóp. Alǵashqy bir-eki kúngi jylýdyń ýaqytynda 200-den astam adam óz úlesterin qosqan.
Qala turǵyndary Qostanaıdaǵy alapat órttiń saldaryn estigennen keıin degbir tappady. Keıbiri qolyndaǵy azyq-túlik, turmysqa qajetti zattar, kórpe-tósek syndy, t.b. nárselerdi ákelip ótkizgen. Ásirese, jastar jaǵy belsendirek kórindi. Olar áleýmettik jeliniń kómegimen kovorkıng-ortalyqqa baılanysqa shyǵyp, qol járdeminen bastap, barsha isterge bir kisideı atsalysqany baıqalady.
Osyǵan oraı qıyn sátte qol ushyn sozyp, kómektesýge nıettengen jandardy tilge tartqan bolatynbyz.
Ákejan BAQYTULY,
Almaty qalalyq «Jastar rýhy» Jastar qanatynyń tóraǵasy:
ELDİŃ BİRLİGİNE RAHMET
Búgin tańerteńnen bastap Qostanaıǵa kómek qolyn sozý maqsatynda gýmanıtarlyq pýnkt ashyldy. Osy pýnktke eriktiler, turǵyndar, kómektesýge nıetti jastar kelip jatyr. Munda azyq-túlikten bólek, jeke gıgıenalyq zattar ákelinýde. Sonymen birge, qurylys zattaryn da alyp kelýde. Jalpy, kómektesem deýshiler qatary artyp barady.
Almaty qalasynyń ákimdigi, máslıhat deptýttary qoldaýyn bildirip jatyr. Olar óz tarapynan materıaldyq jáne rýhanı járdemderin aıamaýda. Dálirek aıtqanda, qarapaıym azamattardyń eńbegi orasan. Shahar turǵyndary turmysta jıi qoldanylatyn zattardy ótkizdi. Onyń ózi úlken kómek. Osyndaı qysyltaıań shaqta qolyndaǵy baryn Qostanaı jurtshylyǵyna úlestirip jatqan jandarǵa rızashylyǵymyz sheksiz.
Sońǵy kúnderi bolǵan tilsiz jaýdyń shyǵynynyń ornyn sál de bolsa bútindeýge atsalysý maqsatynda júk kólikterimen birge ózim de jolǵa attanyp baramyn. Al kómek qolyn sozam deýshi jandarǵa esik ashyq.
Elimizde ár ýaqytta tynyshtyq, baqyt-bereke ornaı bersin. Endi mundaı yńǵaısyz oqıǵa bolmasyn. Tek jaqsylyq pen meıirim nuryn shashqan shýaqty kúnderde jolyǵýǵa jazsyn demekpiz!
Meıirjan OTYNSHIEV,
Almaty qalalyq Amanat partıasynyń atqarýshy hatshysy:
BİRLESE KÓTERGEN JÚK JEŃİL
Bizdiń qalada uıymshyldyq myqty. Azamattar keleńsiz jaǵdaıdy estigen sátten bastap, qol qýsyryp qarap otyrmady. Amanat partıasynyń basshysy Erlan Jaqanulynyń tapsyrmasyna sáıkes Qostanaı oblysyndaǵy tótenshe jaǵdaıǵa járdemdesý, qoldaý jumystary júrgizile bastady. Soǵan sáıkes arnaıy pýnktter ashyldy. Sońǵy ýaqytta azyq-túlik, gıgıenalyq zattar, kórpe-jastyqqa deıin jınaldy. Bas aıaǵy 6 Fuhra avto kóligi jóneltildi. 1 júk kóligi qalalyqtardyń óz erkimen tapsyrǵan zattaryn jınady. Oǵan kómek bildirem deýshiler sany óte kóp. Bul halqymyzdyń qıyn sátte jumyla júk kóteretin qasıetke ıe ekendigin ańǵartady.
Árqashan bereke-birligimiz bekem bolsyn. Elimizde qandaı jaǵdaı bolsa da, aýyzbirshiligimiz ben tynyshtyǵymyz ajyramasyn!
Raýan BAIǴABYL,
«Jastar rýhy» Jastar qanatynyń belsendisi:
JYLY JÚREKTİ JANDAR KÓP
Qostanaıdaǵy órttiń saldaryn estip-bilip, belsendilik tanyta bastadyq. Qazaq jerinde bolǵan apat aıtyp kelgen joq. Iaǵnı kútpegen jerden oryn aldy. Osyǵan oraı almatylyqtar qol qýsyryp qarap otyrmady. Árbir bizben nıettes jan óziniń qolynan kelgenshe baryn berip, qoldaý kórsetýde. Osy bir oqıǵa adamzattyń adamshylyǵyn ańǵartty. Bizdiń shtabty ashqan ýaqyttan bastap, kómektesý nıetimen kelgen kisi qarasy kóp.
Bizdiń esebimizshe, 50-ge jýyq erikti keldi. Olar atqarylyp jatqan isterge qol kómegin berdi. Odan bólek, ártúrli taǵamdar, apatty jaǵdaıda asa qajet bolatyn zattardy ótkizdi. Kovorkıng-ortalyǵymyzǵa kelýshilerdiń sanynda shek bolmady. Ózim de tańdanyp qaldym. Mundaı jylýǵa atsalysýshylardy kórip, rızashylyǵymyz arta tústi.
Endi keleńsiz oqıǵaǵa ushyramaıyq. Amandyq pen saýlyqta jolyǵýǵa jazsyn!
Gúljan BEKENOVA,
Almaty qalalyq máslıhatynyń depýtaty:
KÓMEK DİTTEGEN JERİNE JETERİNE SENEMİZ
Apatty oqıǵa eshqaısymyzdy aınalyp ótpedi. Estigen boıda qabyrǵamyz qaıysty. Tilsiz jaýdyń zalalyn estigen sátte, birden qol ushyn berý kerek degen sheshimge keldik. Qazaqstan Respýblıkasynyń halqy Qostanaı óńirindegi órttiń saldaryn joıýǵa óz kómegin tıgizýde. Ózderińiz kórip-bilip otyrǵandaı, qalamyz da beıjaı qalyp otyrǵan joq. Búkil el-jurt bolyp qoldarynan kelgenshe, 6 júk kóligine eń qajetti zattardy tıep jóneltti. Jolǵa sapar shekken kólikterdiń ishinde qurylys materıaldaryna deıin artylǵan. Ol jerdegi qanshama adam úısiz-kúısiz, oryn-jaısyz qaldy ǵoı. Sol sebepti, úıge qajetti dúnıelerdi de qosa jiberdik.
Sonymen qatar, qalalyq máslıhat depýttary da aıanyp qalmady. 30 tonnalyq júk kóligine tıeletin júkke árbir máslıhat depýtaty úles qosyp, óz qaltalarynan kómek jıdy. Onymen qosa, kásipkerlerdiń de tıgizgen kómegi ushan-teńiz bolyp otyr. Árıne, qarapaıym jandardyń da kórsetip jatqan kómegin baıqaýdamyz.
Bizdiń oıymyzsha, jiberilgen kómek sol jaqtaǵy aǵaıynnyń jetpeı jatqan tusyn jamaıdy degen nıettemiz.
P.S. Qostanaı óńirindegi órtten kelgen zardapqa beıjaı qaramaǵan «Alatay Aqparat» medıa holdıńi quramyndaǵy «Almaty aqshamy» jáne «Vechernıı Almaty» gazetteri men saıtynyń qyzmetkerleri bir kúndik jalaqysyn ıgi kómek retinde aýdardy.