Ál-Farabı atyndaǵy QazUÝ-dyń Ekonomıka jáne bıznes joǵary mektebiniń Qarjy jáne esep kafedrasy QR ǴJBM granttyq qarjylandyrý sheńberinde «Qazaqstannyń jasyl ekonomıkany damytý jaǵdaıynda ESG qarjy quraldaryn transformasıalaý» jobasyn iske asyrýda.
Joba qarjy júıesinde jańa ESG (environmental, social and governance) baǵytyn damytý maqsatynda «jasyl» qarjy quraldaryn zertteýge arnalǵan, dep habarlaıdy Almaty-akshamy.kz Ǵylym jáne joǵary bilim mınıstrligine silteme jasap.
Joba EBJM Qarjy jáne esep kafedrasynyń meńgerýshisi, ekonomıka ǵylymynyń kandıdaty, qaýymdastyrylǵan profesor Ajar Nurmaǵambetovanyń jetekshiligimen júzege asyrylýda. Ǵalymdar tobynda ekonomıka ǵylymynyń kandıdaty, Qarjy jáne esep kafedrasynyń dosenti m.a. Álıa Nurǵalıeva jáne doktorant Qarlyǵash Qurbanova sıaqty bilikti mamandar bar.
«Zertteý aıasynda mańyzdy nátıjelerge qol jetkizildi. Jumys barysynda «jasyl ekonomıka», «jasyl qarjy», «ESG quraldary» jáne «ESG-táýekelder» uǵymdarynyń naqtylanǵan túsindirmesi ázirlendi. Sondaı-aq «jasyl bankıng» tájirıbesi men bankterdiń tabystylyǵy jáne «jasyl bankıngtiń» artyqshylyǵyn belgileý maqsatynda birneshe syzyqtyq regressıanyń jetildirilgen modelin qurý arasynda ózara baılanys ornatyldy. Qazaqstannyń jasyl ekonomıkaǵa kóshý mindetterin iske asyrý kezinde deldaldar sanyn barynsha azaıtýǵa múmkindik beretin ESG qarjy quraldaryn sıfrlandyrýǵa baǵyttalǵan otandyq jáne sheteldik tájirıbe jınaqtaldy», – dep atap ótti joba jetekshisi.
Jobaǵa qatysýshylardyń ǵylymı maqalalary QR Ǵylym jáne joǵary bilim mınıstrliginiń Ǵylym komıteti usynǵan bedeldi, sonyń ishinde halyqaralyq jýrnaldarda jarıalandy.
Yntymaqtastyq aıasynda joba músheleri «Astana» halyqaralyq qarjy ortalyǵynyń (AHQO) Jasyl qarjy ortalyǵymen birlesip jumys istedi. Zertteý toby Turaqty damý maqsattaryna (TDM – 7, 8, 13, 17) qol jetkizý úshin qarjylandyrý quraldary men tetikterin qarastyra otyryp, «Ortalyq Azıadaǵy turaqty qarjy naryǵy» taqyrybynda baıandama daıyndady.
Zertteý nátıjelerin qarjy uıymdary, ekinshi deńgeıli bankter jasyl quraldardyń tıimdiligin baǵalaý kezinde jáne AHQO Jasyl qarjy ortalyǵy paıdalana alady. Ortalyq Azıadaǵy turaqty qarjy naryqtary týraly eki birlesken taqyryptyq baıandamany shyǵarý josparlanýda.