Almatyda Qazaq ulttyq qyzdar pedagogıkalyq ýnıversıtetiniń (QazUPÝ) stýdentteri úshin zamanaýı jańa jataqhana paıdalanýǵa berildi. 120 oryndyq bul nysan jeke ınvestısıalar esebinen salynǵan. Bul týraly Aqshamnews.kz saıty habarlaıdy.
Jańa ǵımaratta tek jatyn bólmeler ǵana emes, dýsh bólmeleri, prachechnaıa, oqý kabınetteri, asqana syndy stýdentterge qajet barlyq jaǵdaılar qarastyrylǵan. Mundaı ınfraqurylym jastardyń oqýyna, demalýyna jáne damýyna tolyq múmkindik beredi.
Stýdenttik jataqhanalar qurylysyn úılestirý jobalyq keńsesiniń jetekshisi Damır Kýtýmovtyń aıtýynsha, keńse 2023 jyldan beri jumys istep keledi. Sol ýaqyttan beri Almatyda 30 nysan salynyp, 8304 stýdentke jataqhana oryndary qamtamasyz etilgen.
"Bul jobada da kásipker arnaıy memlekettik baǵdarlama týraly estip, bizge júgindi. Biz qurylystyń barlyq kezeńinde qoldaý kórsetip, nysan tolyq paıdalanýǵa berilgenge deıin birge jumys istedik. Jyl sońyna deıin taǵy 5000 orynǵa arnalǵan jataqhanalar tapsyrylmaq", – dedi Kýtýmov.
Sonymen qatar, aldaǵy ýaqytta ál-Farabı atyndaǵy QazUÝ-ǵa arnalǵan 12 myń oryndyq jataqhana salý josparlanyp otyr.
Almaty – elimizdegi eń iri bilim berý ortalyǵy, munda júzdegen myń stýdent bilim alady. Sondyqtan qalalyq ákimdik pen jeke ınvestorlar arasyndaǵy seriktestik negizinde jataqhana salý – bolashaq mamandardy qoldaýdyń mańyzdy bóligi.
Qala bıliginiń pikirinshe, mundaı jobalar bilim sapasyn arttyrýmen qatar, stýdentterdiń ómir súrý deńgeıin de jaqsartady.