Bıyldan bastap mektepke jumysqa ornalasqysy keletin pedagogıkalyq joǵary oqý oryndarynyń túlekteri Ulttyq biliktilik testin (UBT) tapsyryp, «Pedagog» mártebesin alýy tıis.
Bul bastama pedagogıkalyq joǵary oqý oryndary men bitirýshi túlekteri úshin jaýapty qadam bolmaq. Sondyqtan salalyq joǵary oqý oryndarynyń mindeti – óz bilim alýshylaryn osy mańyzdy rásimge barynsha daıyndaý qajet, dep habarlaıdy Almaty-akshamy.kz.
Ulttyq biliktilik testileýin (UBT) ótkizý erejeleri men sharttary boıynsha aqparattyq-túsindirý jumystaryn júrgizý maqsatynda Abaı atyndaǵy QazUPÝ Basqarma tóraǵasy-rektor Darhan Bilálov Town Hall formatynda ýnıversıtet stýdentterimen kezdesý ótkizdi. İs-sharaǵa akademıalyq máseleler jónindegi prorektor Maqtaǵalı Bektemesov jáne departament dırektorlary qatysty.
Darhan Bilálov bul prosedýranyń bolashaq pedagogtar úshin mańyzdylyǵyn aıtyp, túlekterdi jumysqa ornalastyrý – ýnıversıtettiń mańyzdy mindetteriniń biri ekenin atap ótti. Búginde bul kórsetkish 96 paıyzdy qurap otyr.
«Biz bolashaq pedagogtardy daıarlaımyz, biz úshin olardyń joǵary sapaly bilimi mańyzdy. Qurmetti bilim alýshylar! Elimizdiń bolashaǵy sizderge baılanysty. Sondyqtan árbir túlek UBT-ǵa jaýapkershilikpen qaraýy kerek. Ýnıversıtetimizdiń profesorlary men oqytýshylary sizderge bilim berdi, kásibı tájirıbelerimen bólisti. Ulttyq biliktilik testine daıyndalý úshin barlyq resýrstardy paıdalaný kerek. UBT-dan stýdentterimiz ótýi úshin ýnıversıtet tarapynan barlyq qajetti jaǵdaılar jasalǵan», – dedi rektor.
Bilim berý sapasyn arttyrý pedagogterdiń kásibıligimen tikeleı baılanysty, árbir bilim berý uıymynyń tıimdi jumysynyń negizi ekeni basa aıtyldy. Sondyqtan bolashaq muǵalimderdiń biliktilik deńgeıin anyqtaý quraly retinde bul testileýdiń mańyzy zor.
Maqtaǵalı Bektemesov pedagogıkalyq kadrlardy daıarlaý sapasyn kúsheıtýge baǵyttalǵan UBT tapsyrý erejeleri men sharttary týraly, bitirýshi kýrs stýdentteri arasynda jańashyldyqtyń qajettiligi men maqsattylyǵy týraly egjeı-tegjeıli aıtyp berdi.
«Bolashaq pedagogtarymyz Ulttyq biliktilik testileýin tapsyrǵannan keıin ǵana mektepterge jumysqa qabyldanatyn bolady», – dep málimdedi prorektor.
Abaı ýnıversıtetiniń Testileý ortalyǵy UBT-ǵa daıyndalý maqsatynda bitirýshi kýrs bilim alýshylarynyń synaq testileýin iske qosty. Olardyń árqaısysy yńǵaıly ýaqytta, kez kelgen jerde, kez kelgen qurylǵydan arnaıy pán men pedagogıka, oqytý ádistemesi boıynsha synaq testileýden óte alady. Ýnıversıtet kitaphanasy Ulttyq biliktilik testileýine daıyndalý úshin oqý-ádistemelik keshendermen (oqý pánderi, pedagogıka, oqytý ádistemesi) jabdyqtalǵan.
Stýdenttermen beıresmı kezdesý joǵary deńgeıde ótti. Oqý úderisi, emtıhandardy tapsyrý formaty, grantqa ótý jáne t.b. suraqtar qoıyldy. Jıynǵa qatysýshylardyń belsendiligin atap ótken ýnıversıtet basshylary suraqtar men usynystarǵa jan-jaqty jaýap berdi.