Sebebi, kórshiles elderde «stels-omıkron» shtamy tirkelip jatyr.
«Egemen Qazaqstan» basylymyna suhbat bergen Premer-Mınıstrdiń orynbasary Eraly Toǵjanov osylaı dedi, dep habarlaıdy Almaty-akshamy.kz
Vıse-premerdiń aıtýynsha, qaýip barynsha tómendegen. Búginde osy vırýspen aýyrýdyń eń tómengi deńgeıi saqtalyp tur, ıaǵnı táýligine shamamen 20 naýqastaı ǵana anyqtalyp otyr.
«İndet qarqynynyń báseńdeýine Qazaqstanda ǵana emes, búkil álemde jaǵdaıdyń turaqtanǵany yqpal etip jatyr. Árıne, biz jańa «resıdıvterdi» joqqa shyǵarmaımyz, jańa shtamdardyń paıda bolýyn eskere otyryp, arqany keńge salýǵa áli erte ekenin bilemiz. Eń bastysy, biz koronavırýspen kúresýdi úırendik. Búginde qalypty ómirge oralýdyń ýaqyty keldi dep oılaımyn. Adamdardyń tynysh ómir súrýine, tolyqqandy jumys isteýine, qoryqpaı qarym-qatynas jasaýyna múmkindik bolýy kerek. Osyndaı múmkindikterdi keńeıtý maqsatynda biz eń mańyzdy shekteýlerdiń birin joıdyq, kórshiles úsh elmen: Reseı, Ózbekstan jáne Qyrǵyzstanmen qurlyq shekarasyn ashtyq. Kóptegen memleketpen áýe qatynasy qaıta jandandy. 57 el úshin vızasyz rejim qalpyna keltirildi. Bul rette Qazaqstanǵa kirerde PTR-testileýdi mindetti shart retinde qaldyrdyq. Óıtkeni bul – epıdemıalyq jaǵdaıdy baqylaýǵa kómektesetin sharalardyń biri. Sonymen qatar ujymdarda, adamdar kóp jınalatyn jerlerde maska taǵý talabyn kúshinde qaldyrdyq. Halyq, negizinen, osyǵan daǵdylanyp ta qaldy. Japonıa, Qytaı, Sıngapýr sıaqty kóptegen elde pandemıadan buryn da maska taǵý rejimi qalypty jaǵdaıǵa aınalǵan, sebebi juqpaly aýrýlardyń basqa da kóptegen túri bar», - dedi Eraly Toǵjanov.