Búginde Qazaqstanda 70-ten asa belgıalyq kásiporyndar jumys isteıdi
Qazaq ulttyq agrarlyq zertteý ýnıversıtetine Belgıa Koróldiginiń Qazaqstandaǵy elshisi Anrı Vantıgem men Vallon eksport jáne ınvestısıalar jónindegi agenttigi bas dırektory Shantal De Ble (AWEX) bastaǵan delegasıasy keldi. Sapar barysynda olar ekijaqty ózara tıimdi yntymaqtastyqty ornatý jáne agroónerkásiptik keshen salasyndaǵy birlesken ǵylymı ınovasıalyq jobalardy iske asyrý jobalaryn talqylady dep habarlaıdy almaty-akshamy.kz
Delegasıa quramynda FIT agenttiginiń Ortalyq Eýropa elderi boıynsha óńirlik dırektory Bart Van den Bosh, Vallon agenttiginiń EýrAzEQ elderi boıynsha eksport jáne ınvestısıalar jónindegi óńirlik menedjeri (AWEX) Aleksandra Tonkıh, Qazaqstandaǵy Belgıa Koróldigi elshiliginiń saýda-ekonomıkalyq keńesshisi Aıjan Musaqanova, Eno provınsıasynyń Agronomıa jáne agroónerkásip halyqaralyq ortalyǵynyń (SARAH) agronomıa jónindegi menedjeri Fransýa Sernels, ProAniWal kompanıasynyń bas dırektory Paskal Lerýa bar.
Belgıa – halyqtyń ómir súrý deńgeıi óte joǵary, BUU-nyń adam damýy Indeksinde 17-shi orynǵa ıe memleket. Eki el arasyndaǵy yntymaqtastyq Belgıa Koróldigi 1991 jyldyń 31 jeltoqsanynda Qazaqstan Táýelsizdigin moıyndaǵannan bastaý alady. Búginde Qazaqstanda 70-ten asa belgıalyq kásiporyndar jumys isteıdi.
Kezdesý barysynda sonymen birge Qazaqstan-Belgıa arasyndaǵy joǵary bilim berý, ǵylymı-zertteý qyzmeti men aýyl sharýashylyǵy salasyndaǵy jańa múmkindikterdi arttyrý máseleleri talqylandy. Shantal De Ble hanymnyń aıtýynsha, QazUAZÝ ǵalymdary Belgıanyń aýyl sharýashylyǵy daqyldaryn ósirý jónindegi tájirıbesin zerdelep, alynǵan tájirıbeni elimizdegi kartop transfertine jáne onyń beıimdelýine qoldana alady.
Eno provınsıasynyń Agronomıa jáne agroónerkásip halyqaralyq ortalyǵynyń (CARAH) agronomıa jónindegi menedjeri Fransýa Sernels QazUAZÝ ǵalymdarymen yntymaqtastyq ornatý jónindegi bastamalardy qoldaıtynyn jáne birlesken jobalar jasaý jóninde óziniń usynystaryn bildirdirdi. Bizdiń ǵalymdarymyzdyń osy kompanıa mamandarymen yntymaqtastyǵy Qazaqstanda kartop daqyldaryn kóbeıtý úshin jańa agrotehnologıalardy engizýge, sondaı-aq fermerlerdiń quzyretin arttyrýǵa múmkindik beredi dep sanaımyn.
QazUAZÝ basshylarynyń aıtýynsha, ýnıversıtettiń mıkroklonaldy kóbeıý zerthanasynda kartopty vırýssyz otyrǵyzý materıalyn shyǵarýǵa bolady. Sondaı-aq jemis-kókónis sharýashylyǵy ǴZI zerthanalaryn da osy ıgilikti iske qosý qajet dep oılaımyz. Bolashaqta elimizde kartopty óńdeýdi joǵary deńgeıge kóterý josparlanýda. Oǵan oqý ornymyzdyń bilikti ǵalymdary da óz úlesterin qosatyn bolady.
Kezdesý barysynda ProEnıVol (ProAniWal) kompanıasynyń bas dırektory Paskal Lerýa mal sharýashylyǵy salasynda birlesip jumys isteý tásilderin usynyp, kompanıanyń mal sharýashylyǵy salasyndaǵy tájirıbesimen bólisýge daıyn ekenin jetkizdi. Onyń aıtýynsha, "ProAniWal" – genetıka jáne mal tuqymyn asyldandyrý, baǵý, azyqtandyrý, menedjment, monıtorıń, qorshaǵan ortany qorǵaý, marketıń, ǵylymı zertteýler, kadrlardy daıarlaý jáne t. b. baǵyttar boıynsha Vallonıada (Belgıa) mal sharýashylyǵyn damytýmen aınalysatyn komersıalyq emes uıym. Sonymen qatar bul kompanıa janýarlardyń parnıktik gazdar shyǵaryndylaryn azaıtýynyń balama joldaryn zertteýmen aınalysady.
Óz sózinde QazUAZÝ Basqarma tóraǵasy - Rektor Tilektes Espolov ýnıversıtet óz tarapynan agrokeshen salasyndaǵy ónim óndirýdi ulǵaıtýǵa yqpaly tıetin barlyq birlesken ınovasıalyq ǵylymı jobalardy júzege asyrýǵa barlyq jaǵdaıdy jasaıdy dep sendirdi.
Kezdesý sońynda qonaqtar Vagenıngen ınstıtýty, Ósimdikterdiń mıkrokanaldy kóbeıý zerthanasy, Agrotehnıkalyq jáne Sý Habtarynda, Qazaqstan-Belarýs agroınjenerlik ınovasıalyq jáne Qazaq-Japon Azyq-túlik tehnologıalary ortalyqtarynda, Sút jáne sút ónimderiniń referenttik zerthanasynda bolyp, ǵylymı izdenisterdiń jetistikterimen tanysa kele QazUAZÝ bazasyndaǵy damyǵan ǵylymı-ınnovasıalyq ınfraqurylym men ǵalymdardyń qyzmetine joǵary baǵa berdi.