QMG-nyń jeke kredıttik reıtıńi artty.
«QazMunaıGaz» UK AQ «Samuryq-Qazyna» AQ-dan «QMG Qashaǵan B.V.» JSHJK kompanıasyndaǵy 50% úlesin satyp aldy, dep habarlaıdy Almaty-akshamy.kz.
QMG baspasóz qyzmetiniń málimeti boıynsha, 2022 jyly 15 qyrkúıekte «QazMunaıGaz» UK AQ (QMG) 2015 jyly jasalǵan Opsıondyq kelisim aıasyndaǵy óz quqyǵyn paıdalanyp, «Samuryq-Qazyna» AQ-dan (Qor) Soltústik Kaspıı jobasy (Qashaǵan jobasy) boıynsha Ónimdi bólý týraly kelisimniń 16,88% tıesili «QMG Qashaǵan B.V.» JSHJK kompanıasyndaǵy 50% úlesin 3,8 mlrd AQSH dollaryna satyp alǵan.
«Bul – «QazMunaıGaz» úshin sońǵy jyldardaǵy eń iri satyp alý mámileleriniń biri. Qashaǵan jobasyndaǵy úlesi artýy arqyly QMG-nyń shoǵyrlandyrylǵan óndirý, EBITDA, taza paıda jáne aktıvter kórsetkishteri jaqsarady. Bul rette kompanıanyń qaryzy da artady. Satyp alý úshin tólem QMG Qashaǵan B.V. aqsha aǵymdarynyń esebinen júzege asyrylady dep josparlanýda», - dep habarlady QMG Basqarma tóraǵasynyń orynbasary Dáýren Qarabaev.
2015 jyly QMG túsken qarajatty sol jyldary munaı baǵasynyń kúrt tómendeýine baılanysty QMG eýrooblıgasıalaryndaǵy «Taza qaryz/ EBITDA <= 3.5h» qarjylyq kovenantynyń buzylýyna jol bermeý maqsatynda qaryzdy azaıtýǵa paıdalaný úshin QMG Qashaǵan B.V. kompanıasyndaǵy 50% úlesin Qorǵa satty.
Qazirgi satyp alýdy júzege asyrýǵa QMG-nyń qarjylyq jaǵdaıyn jaqsartý boıynsha júrgizilgen úlken jumys sep boldy, bul osy mámileni kredıttik reıtıńterge áser etpeı iske asyrýǵa múmkindik berdi.
Bul kezeńde qarjylyq jaǵdaıdy jaqsartý jónindegi is-sharalar mınorıtarlyq aksıonerlermen kelissózder júrgizýdi jáne «QazMunaıGaz «Barlaý Óndirý» AQ-daǵy úlesin shoǵyrlandyrýdy, QMG-nyń jarıa boryshyndaǵy kovenantty paketti ońtaılandyrýdy, sondaı-aq QMG aqsha aǵymdaryna sáıkes uzaq merzimdi óteý kestesin qurýdy qamtydy. Atap aıtqanda, QMG eýrooblıgasıalarymen jasalǵan birqatar mámileler nátıjesinde kovenanttyq paketten «Taza borysh/ EBITDA <= 3.5h» qarjylyq kovenanty tolyǵymen alyp tastaldy.
Júrgizilgen jumys nátıjesinde QMG-nyń jalpy qaryzy shoǵyrlandyrylǵan aýdıtten ótken qarjylyq eseptilikke sáıkes 2014 jyldyń sońyndaǵy jaǵdaı boıynsha 19,2 mlrd AQSH dollarynan 2022 jyldyń birinshi jartyjyldyǵynyń sońynda 8,4 mlrd AQSH dollaryna deıin azaıdy. QMG Qashaǵan B.V. úlesin satyp alý mámilesi aıaqtalǵannan keıin QMG-nyń jalpy qaryzy shamamen 10,7 mlrd AQSH dollaryna jetedi.
Halyqaralyq reıtıń agenttikteri osy kezeń ishinde QMG-nyń jeke kredıttik reıtıńin arttyryp, kompanıanyń qarjylyq jaǵdaıy jaqsarǵanyn atap ótti.
Buǵan deıin QMG Qashaǵan B.V. kompanıasynyń 50% úlesine aldyn ala shekteý qoıylǵan edi, ony bıyl Gaaga (Nıderland) Apelásıalyq soty alyp tastady. Bul sheshimge qatysty Nıderland Joǵarǵy sotyna túsken shaǵym QMG-nyń 50% úlesin satyp alý týraly mámilesine áser etpeıdi, óıtkeni Apelásıalyq sottyń shekteýdi alyp tastaý týraly sheshimi dereý kúshine enedi.
Mámile týraly tolyǵyraq «QazMunaıGazdyń» qarjylyq esebinde baıandalatyn bolady.