Memleket basshysy DDU Bas dırektory Tedros Gebreıesýsty jáne uıymnyń Eýropadaǵy óńirlik búrosynyń basshysy Hans Klúgeni qabyldady
Astanada ótip jatqan Medısınalyq-sanıtarıalyq alǵashqy kómek jónindegi jahandyq konferensıa aıasyndaǵy kezdesý barysynda Dúnıejúzilik densaýlyq saqtaý uıymymen ózara yntymaqtastyq máseleleri talqylandy.
Memleket basshysy qonaqtarǵa iltıpat bildire otyryp, elimiz eń mańyzdy uıymnyń biri sanalatyn DDU-men halyqaralyq deńgeıde nátıjeli qarym-qatynas jasap otyrǵanyn atap ótti.
– Elimiz árqashan Sizdiń qyzmetińizdiń tabysty bolýyna septigin tıgizedi. Qazirgideı kúrdeli jaǵdaıda DDU-ny basqarý óte qıyn ekenin bilemin. Bul – naǵyz synaq. Sizge álemdegi kóptegen el men delegattardyń túrli pikirlerine qulaq asyp, tıimdi sheshim tabýǵa jáne mámile jasaýǵa týra keledi. Sizge tabys tileımin. Biz óz tarapymyzdan Sizge árdaıym kómektesemiz jáne qoldaý kórsetemiz, – dedi Memleket basshysy.
Qasym-Jomart Toqaev pandemıadan keıin atalǵan salany qalypqa keltirý, halyq densaýlyǵyn saqtaý isindegi negizgi maqsattarǵa qol jetkizý úshin densaýlyq saqtaý júıesin nyǵaıtýǵa Qazaqstannyń belsendi túrde kiriskenine nazar aýdardy.
Bul rette Prezıdent DDU jetekshiligimen júzege asyrylyp jatqan tıisti bastamalarǵa tolyq qoldaý kórsetýge elimizdiń daıyn ekenin naqtylady.
Memleket basshysynyń aıtýynsha, Qazaqstan BUU-nyń 2030 jylǵa deıingi ornyqty damý maqsattaryna qol jetkizýge, sonyń ishinde halyqty densaýlyq saqtaý qyzmetimen tolyq qamtýǵa, ana men bala óliminiń deńgeıin tómendetýge, sondaı-aq týberkýlez epıdemıasyn tolyqtaı joıýǵa nıetti.
Óz kezeginde DDU Bas dırektory Almaty jáne Astana deklarasıalarynyń qabyldanýy uıym men jeke ózi úshin erekshe mańyzdy ekenin atap ótti. Óıtkeni ol Densaýlyq saqtaý mınıstri qyzmetin atqarǵan kezinde, medısınalyq-sanıtarıalyq alǵashqy kómekti damytý máselesimen maqsatty túrde aınalysqan.
Budan bólek, kezdesýde Dúnıejúzilik densaýlyq saqtaý uıymymen SHYU aıasyndaǵy yntymaqtastyq, Ortalyq Azıadaǵy densaýlyq pen ál-aýqatty qoldaý jónindegi 2022-2025 jyldarǵa arnalǵan jol kartasyn júzege asyrý máseleleri talqylandy.
Kezdesý sońynda Qasym-Jomart Toqaev Jahandyq konferensıany uıymdastyrýǵa atsalysqany jáne osy mańyzdy sharaǵa qatysqany úshin Tedros Adhanom Gebreıesýs pen Hans Klúgege alǵys aıtty.