Mundaı mártebeni Qazaqstannyń 17 oblysy men úsh megapolısinde ornalasqan 20 úzdik orynǵa barǵan saıahatshy ıe bola alady.
Eń basty mindet - týrıs belgilengen oryndarǵa jaı baryp qana qoımaı, sonda ornatylǵan fotozonaǵa arnaıy sýretke túsip, áleýmettik jelige «Neonomad2022» heshtegimen sýretti júkteýi tıis, dep habarlaıdy Almaty-akshamy.kz Qazaqtv.com saıtyna silteme jasap.
Ondaı fotoǵa túsetin alǵashqy oryn qazir elordadaǵy «Nurly jol» býlvarynda paıda boldy.
«Bul aksıa - alǵashqy qadamdardyń biri ǵana. Birinshi osyndaı fotoramkalar, keıin kvest oılap tabý josparymyzda bar. Mysaly, búgin ol ornatylǵan 20 fotozonanyń janyna fotoǵa túsý bolýy múmkin, erteń ulttyq parkterdiń barlyǵyna bar, al keıin tipti ulttyq saıabaqtardaǵy qoqys tazalaý bolýy múmkin. Qazir fotoramkalar tek birneshe qalalarda ornalastyryldy, biraq jergilikti ákimdikter, jeke seriktesterimiz bizge qoldaý kórsetýde. 1 tamyzǵa deıin barlyq 20 fotoramkany ornatyp úlgeremiz dep ýáde etildi», - dedi «Kazakh Tourism» UK AQ basqarma tóraǵasy Talǵat Amanbaev.
«Neonomad-2022» aksıasynyń alǵashqy qatysýshylarynyń biri - 72 jastaǵy jıhankez Sársenbaı Qotyrashev boldy. Elordaǵa jaıaý jetken qarıa birden bas shahardyń kórikti oryndaryn aralap, estelik sýretke tústi. Qazir elordanyń tórinde ornalasqan fotoǵa túsýge arnalǵan oryn kún sanap júzdegen qala turǵyndary men qonaqtarynyń qyzyǵýshylyǵyn oıatýda.
Jobanyń qorytyndysy tek jyl sońyna qaraı belgili bolady. Degenmen, shara jyl saıyn óz jalǵasyn tabady. Sondyqtan «qazirgi zamanǵy kóshpendi» mártebesin bolashaqta kez kelgen saıahatshy ala alady.