2024 jylǵy 2 sáýirde Pavlodar qalasynyń No2 sotynda «QazAvtoJol» Ulttyq kompanıasy» AQ Pavlodar oblystyq fılıalynyń dırektory men bas mamanǵa qatysty qylmystyq is qaraldy, dep habarlaıdy almaty-akshamy.kz.
Olarǵa (Qylmystyq kodekstiń 366-baby 3-bóliginiń 1-tarmaǵy) bopsalaý arqyly iri kólemde para aldy degen aıyp taǵyldy.
«QazAvtoJol» UK AQ dırektory A.M. 2023 jyldyń 29 maýsymynda kómektesýshisi «QazAvtoJol» UK AQ bas mamany Ó.Z.-men, ıaǵnı oryndalǵan jumystardyń aktisine qol qoımaımyn jáne Pavlodar-Astana avtojolyn kútip ustaý boıynsha memlekettik satyp alý týraly shartty buzamyn dep qorqytyp, merdigerden jalpy somasy 4 000 000 teńge para retinde aqsha alǵan.
Sottalýshylardyń kinási jábirlenýshiniń, kýálardyń aıǵaqtarymen, sot saraptamalarynyń qorytyndylarymen, zattaı jáne qujattamalyq dáleldemelermen dáleldendi.
Sondaı-aq A.M. laýazymdyq ókilettikterin teris paıdalaný faktisi boıynsha aıyptaldy (QK 361-b. 4-b. 3) t.).
«Prokýror A.M.-ǵa túpkilikti 8 jyl bas bostandyǵynan aıyrý jazasyn, al Ó.Z.-ǵa – 7 jylǵa bas bostandyǵynan aıyrý jazasyn taǵaıyndaýdy surady. Sottalýshylar kinálaryn tolyǵymen moıyndamady, aqtaýdy surady», - dep habarlady Pavlodar qalasy №2 sotynyń baspasóz qyzmeti.
Sot jeńildetetin mán-jaılardy, asyraýynda jas balalardyń bolýyn eskere otyryp, A.M.-ǵa 8 jyl bas bostandyǵynan aıyrý, al Ó.Z.-ǵa 7 jylǵa bas bostandyǵynan aıyrý jazasyn taǵaıyndady.
A.M. - qyzmettik ókilettikterin teris paıdalaný faktisi boıynsha (QK 361-b. 4-b. 3) t.) - qylmysqa qatysýy týraly dáleldemelerdiń bolmaýyna baılanysty aqtaldy.
Úkim zańdy kúshine engen joq.